కాంగ్రెస్‌లో డీసీసీ సంక్షోభం
– మీనాక్షీ నటరాజన్ సిఫారసులు బుట్టదాఖలు?
– రేవంత్ జోక్యంతో వర్గపోరాటాలు మళ్లీ ఎగిసిపడ్డాయా?
– కుల సమీకరణలు లేకపోవడంపై నేతల ఆగ్రహం
– నియామకాలతో జిల్లాల్లొ తిరుగుబాట్లు మోగుతున్న శంఖాలు
– ఒక్క పోస్టుకు ఐదుగురు—రూల్స్ బ్రేక్ అయినట్టేనా?
జ్ఞాన తెలంగాణ,స్టేట్ బ్యూరో :
తెలంగాణ కాంగ్రెస్‌లో డీసీసీ అధ్యక్షుల నియామకం పెద్ద దుమారం రేపుతోంది. తొమ్మిది నెలలుగా పాదయాత్రలు చేస్తూ, క్షేత్రస్థాయి ప్రజాభిప్రాయాలు సేకరిస్తూ చేసిన ఇన్‌చార్జి మీనాక్షీ నటరాజన్ కృషి పూర్తిగా బూటకమైందా అనే ప్రశ్న పార్టీ శ్రేణుల్లో వినిపిస్తోంది. ఆమె సిఫారసు చేసిన పేర్లలో ఎక్కువ మందికి అవకాశాలు రాకపోవడం, చివరి నిమిషంలో సీఎం రేవంత్‌రెడ్డి జోక్యం చేసుకుని ఏఐసీసీ ప్రధాన కార్యదర్శి కేసీ వేణుగోపాల్ సహకారంతో తన వర్గానికే పగ్గాలు అప్పగించుకున్నారని నేతలు ఆరోపిస్తున్నట్లు గాంధీభవన్ వర్గాలు చెబుతున్నాయి. అదే సమయంలో సీనియర్ నేత జీవన్‌రెడ్డి లేవనెత్తిన, “కాంగ్రెస్ అసలైన కార్యకర్తలకు గుర్తింపు లేదా?” అన్న ప్రశ్న చర్చకు కేంద్రబిందువైంది.
రాష్ట్రవ్యాప్తంగా డీసీసీ పదవుల కేటాయింపుపై తీవ్ర అసంతృప్తి వెల్లువెత్తుతోంది. దక్షిణ తెలంగాణలో రెడ్డి వర్గానికి, ఉత్తర తెలంగాణలో వెలమ వర్గానికి ఒక్క పోస్టు కూడా రాకపోవడంపై వివిధ జిల్లాల్లో నేతలు మండిపడుతున్నారు. గతంలో వరంగల్, నిర్మల్, మంచిర్యాల, ఆసిఫాబాద్ జిల్లాల్లో వెలమ నాయకులకు డీసీసీ బాధ్యతలు ఉండగా, ఈసారి పూర్తిగా ఏమాత్రం అవకాశాలు లేకపోవడంతో ఆ వర్గం నాయకులు ఆగ్రహం వ్యక్తంచేస్తున్నారు. ఇదే సమయంలో మీనాక్షీ మొదట పెట్టిన రూల్స్ అన్నీ నీరుగారిపోయాయనే విమర్శలు వస్తున్నాయి. ఒక పోస్టుకు ఒకరే ఉండాలని నిబంధన పెట్టినా పలువురు ఎమ్మెల్యేలు, కార్పొరేషన్ చైర్మన్లు, వైస్ ప్రెసిడెంట్లకు డీసీసీల్లో చోటు కల్పించారు. కుటుంబ సభ్యులకు అవకాశం ఇవ్వబోమని చెప్పి, సిద్దిపేటలో నర్సారెడ్డి కూతురు ఆంక్షారెడ్డిని నియమించడం కూడా తీవ్ర చర్చనీయాంశమైంది.
కొన్ని జిల్లాల్లో పరిస్థితి మరింత వేడెక్కింది. నల్లగొండలో కొత్త డీసీసీ అధ్యక్షుడిపై మంత్రి కోమటిరెడ్డి వెంకటరెడ్డి నేరుగా ఫిర్యాదు చేయడం, తన కుటుంబంపై దూషణలు చేశాడని ఆరోపించడం, పీఠం రాకపోవడంతో గుమ్మల మోహన్‌రెడ్డి తీవ్ర ఆవేదన వ్యక్తం చేయడం కాంగ్రెస్‌లో అంతర్గత యుద్ధమే నడుస్తోందని సూచిస్తోంది. వరంగల్, మహబూబాబాద్, జనగామ జిల్లాల్లో ఒకే ఇంటికి రెండు పదవులు ఇచ్చారనే ఆరోపణలు వినిపిస్తున్నాయి. కరీంనగర్‌లో మంత్రే సిఫారసు చేసినా ఆ అభ్యర్థికి అవకాశం రాకపోవడం, జగిత్యాలలో సంజయ్‌కు చోటు దక్కకపోవడం, వనపర్తిలో దరఖాస్తు కూడా చేయని వ్యక్తికి డీసీసీ పగ్గాలు ఇవ్వడం, ఉమ్మడి మెదక్ జిల్లాలో దామోదర్–జగ్గారెడ్డి మధ్య ఘర్షణ పెరగడం—ఈ సమస్త పరిణామాలు కాంగ్రెస్‌లో అంతర్గత విభేదాలు ఏ స్థాయిలో పెరిగాయో స్పష్టంగా చూపుతున్నాయి.
