హైదరాబాద్లో లక్ష ఇందిరమ్మ ఇళ్లు
Mobile : 80082-06714
- స్పీడ్ పోస్ట్తో గంజాయి దందా బట్టబయలు - July 2, 2026
- రైతు భరోసా మూడో విడత విడుదల - July 2, 2026
- హైదరాబాద్లో లక్ష ఇందిరమ్మ ఇళ్లు - July 2, 2026
- త్వరలో టెండర్లకు ప్రభుత్వం సిద్ధం
- ఇన్నర్ రింగ్ రోడ్ పరిధిలో నిర్మాణాలు
- 19 నియోజకవర్గాల్లో విడతల వారీగా అమలు
- 400 చదరపు అడుగుల శాశ్వత గృహాలు
- అర్హత ఆధారంగానే లబ్ధిదారుల ఎంపిక
జ్ఞానతెలంగాణ,హైదరాబాద్ ప్రతినిధి :
హైదరాబాద్ నగర పరిధిలో అర్హులైన పేదలకు సొంత ఇంటి కలను సాకారం చేయడానికి తెలంగాణ ప్రభుత్వం మరో కీలక నిర్ణయం తీసుకుంది. గ్రేటర్ హైదరాబాద్, సైబరాబాద్, మల్కాజ్గిరి మున్సిపల్ కార్పొరేషన్ల పరిధిలోని ఇన్నర్ రింగ్ రోడ్ ప్రాంతంలో లక్ష ఇందిరమ్మ ఇళ్ల నిర్మాణానికి త్వరలోనే టెండర్లు పిలవనున్నట్లు రాష్ట్ర గృహనిర్మాణ శాఖ మంత్రి పొంగులేటి శ్రీనివాస రెడ్డి ప్రకటించారు. గతంలో నగరానికి 20 నుంచి 30 కిలోమీటర్ల దూరంలో ఇళ్ల నిర్మాణం చేపట్టడం వల్ల ఉపాధి అవకాశాలు కోల్పోతామనే భయంతో అనేక మంది లబ్ధిదారులు అక్కడ నివసించడానికి ఆసక్తి చూపలేదని ప్రభుత్వం గుర్తించింది. ఈ నేపథ్యంలో ప్రస్తుతం లబ్ధిదారులు నివసిస్తున్న ప్రాంతాలకు సమీపంగా, కేవలం 5 నుంచి 8 కిలోమీటర్ల పరిధిలోనే గృహాలను నిర్మించాలని నిర్ణయించింది. ఈ భారీ గృహ నిర్మాణ ప్రాజెక్టుకు అవసరమైన భూముల సేకరణ ప్రక్రియ మరో రెండు నుంచి మూడు రోజుల్లో పూర్తవుతుందని మంత్రి తెలిపారు. అనంతరం టెండర్ల ప్రక్రియ ప్రారంభించి నిర్మాణ పనులను వేగవంతం చేయనున్నట్లు వెల్లడించారు. నగరంలోని మొత్తం 19 అసెంబ్లీ నియోజకవర్గాల్లో ఈ పథకాన్ని దశలవారీగా అమలు చేయాలని ప్రభుత్వం ప్రణాళిక రూపొందించింది. తొలి దశలో పైలట్ ప్రాజెక్ట్గా ప్రతి నియోజకవర్గంలో 500 నుంచి 1,000 ఇళ్ల నిర్మాణాన్ని ప్రారంభిస్తారు. ఆ తర్వాత రెండో, మూడో విడతల్లో మిగిలిన ఇళ్లను కూడా మంజూరు చేసి అర్హులైన పేదలకు అందజేస్తామని మంత్రి వివరించారు. ప్రతి ఇంటిని కనీసం 400 చదరపు అడుగుల విస్తీర్ణంతో నిర్మించి, అవసరమైన మౌలిక సదుపాయాలతో కూడిన గౌరవప్రదమైన నివాసంగా తీర్చిదిద్దేందుకు ప్రభుత్వం చర్యలు చేపడుతోంది. లబ్ధిదారుల ఎంపికలో ఎలాంటి రాజకీయ జోక్యానికి అవకాశం ఉండదని, పూర్తిగా అర్హత ప్రమాణాల ఆధారంగానే ఎంపిక జరుగుతుందని అధికారులు స్పష్టం చేశారు. పేద కుటుంబాలకు శాశ్వత నివాసాన్ని అందించడంతో పాటు నగర పరిధిలోనే ఉపాధి అవకాశాలను కొనసాగించేలా ఈ ప్రణాళిక రూపొందించినట్లు ప్రభుత్వం తెలిపింది. ఇందిరమ్మ ఇళ్ల పథకం ద్వారా వేలాది కుటుంబాల సొంతింటి కల నెరవేరడంతో పాటు నగరంలోని నిరుపేదల జీవన ప్రమాణాలు మరింత మెరుగుపడతాయని ప్రభుత్వం ఆశాభావం వ్యక్తం చేసింది.
