ప్రొద్దుటూరుకు కొత్త దిశ… సర్పంచ్ అభ్యర్థిగా నాని స్వాతి రత్నం
- చంద్రమోహన్ రెడ్డి–శ్రీనివాస్–వెంకట్ రెడ్డి–నరసింహారెడ్డి చూపిన మార్గంలో సాగుతున్న నాని స్వాతి రత్నం ప్రతిజ్ఞ
- 25 ఏళ్ల ప్రజా విశ్వాసం బలోపేతంగా… ప్రొద్దుటూరుకు కొత్త దిశ చూపాలనే నాని స్వాతి రత్నం సంకల్పం
- గ్రామమే నా కుటుంబం” అన్న నమ్మకంతో… ఇంటి మనిషిలా సేవ చేస్తానని హామీ
జ్ఞాన తెలంగాణ, శంకర్ పల్లి: ప్రొద్దుటూరు గ్రామంలో రానున్న సర్పంచ్ ఎన్నికల నేపథ్యంలో, సర్పంచ్ అభ్యర్థి గా నాని పెద్ద అడివయ్య మనుమడు, నాని చంద్రయ్య పెద్ద కుమారుడు నాని స్వాతి రత్నం గ్రామ ప్రజలముందు తన సేవా సంకల్పాన్ని శుక్రవారం వెల్లడించారు. “నా ప్రజాసేవ ప్రయాణం పదులకు కాదు, పదేళ్లకు పైగా నిలిచిపోయిన విశ్వాసానికి నిదర్శనం” అని ఆయన భావోద్వేగంగా పేర్కొన్నారు.
2006లో మొదటిసారి వార్డు సభ్యుడిగా ఎన్నికై ప్రజల సమస్యల మధ్యే తిరిగిన అనుభవం, 2018లో మళ్లీ ప్రజలు ఇచ్చిన మద్దతు—ఈ రెండూ తనకు ప్రజా సేవనే లక్ష్యమని గుర్తుచేశాయని నాని స్వాతి రత్నం తెలిపారు. “గత 25 ఏళ్లుగా నేను ప్రొద్దుటూరు ప్రజల ఇంటి మనిషిని… సేవకుడినే” అని పేర్కొన్నారు.
గౌరవనీయులు మాజీ సర్పంచ్‌లు చంద్రమోహన్ రెడ్డి, కే. శ్రీనివాస్, బొల్లారం వెంకట్ రెడ్డి, ఏనుగు నరసింహారెడ్డి గార్ల చెంత పనిచేసిన అనుభవం తన రాజకీయ పాఠశాల అని ఆయన భావోద్వేగంగా అన్నారు. “గ్రామ ప్రజలతో ఎలా ఉండాలి, గ్రామానికి ఎలా సేవ చేయాలి అనేది వారిదగ్గర నేర్చుకున్న పాఠం” అని ఆయన వివరించారు.
సర్పంచ్ పదవికి అవకాశం వస్తే గ్రామ ప్రజలలో ఒకరిలా, కుమారుడిగా, తమ్ముడిగా, సేవకుడిగా పని చేస్తానని నాని స్వాతి రత్నం హామీ ఇచ్చారు. ప్రజల ఇంటి ముందుకే వెళ్లి వారి సమస్యలు తెలుసుకుని పరిష్కారానికి కృషి చేస్తానని చెప్పారు.
“గ్రామ ప్రజలు నా కుటుంబం. మీ సంతోషమే నా బలం. మీ అభివృద్ధే నా లక్ష్యం. మీ కాలిలో ముళ్లు విరిగితే నా పంటితో తీస్తా… మీ కళ్లలో దుమ్ము పడితే నా కనుగొడ్డుతో తీస్తా” అని భావోద్వేగంతో చెప్పారు.
అలాగే ఓటర్లందరికీ వినయపూర్వక నమస్కారాలు తెలుపుతూ, “మీరు ఆశీర్వదిస్తే సర్పంచ్ బాధ్యతలను భుజాన వేసుకుని ప్రొద్దుటూరు అభివృద్ధికి అంకితభావంతో పనిచేస్తాను” అని అన్నారు.
