వలసలు నివారించడమే లక్ష్యం : ఏపీఓ కడెం రామ్మోహన్
- వలసలు నివారించడమే లక్ష్యం : ఏపీఓ కడెం రామ్మోహన్ - November 20, 2026
- మల్టీపర్పస్ సిబ్బందికి జీవిత బీమా భరోసా : కట్టంగూర్ సర్పంచ్ ముక్కాముల శ్యామల శేఖర్ - November 19, 2026
- నడవలేని స్థితిలోనూ పింఛన్ కోసం ఎదురుచూపులు ఐదేళ్లుగా మంచానికే పరిమితం.. నాలుగుసార్లు సదరం క్యాంపునకు వెళ్లినా ఫలితం శూన్యం - November 18, 2026
జ్ఞాన తెలంగాణ, కట్టంగూర్, నవంబర్ 20: ఎల్నినో ప్రభావంతో కూలీలు ఉపాధి కోసం ఇతర ప్రాంతాలకు వలస వెళ్లకుండా గ్రామాల్లోనే పనులు కల్పించడమే లక్ష్యంగా ఉపాధి హామీ పథకం ద్వారా పనులు చేపడుతున్నట్లు ఏపీఓ కడెం రామ్మోహన్ తెలిపారు. శుక్రవారం మండలంలోని మునుకుంట్ల గ్రామంలో కోమటికుంటలో జరుగుతున్న ఉపాధి హామీ (వీబీ జీరాంజీ) పనులను ఆయన పరిశీలించారు. ఈ సందర్భంగా కూలీలతో మాట్లాడి వారి సమస్యలు, పనుల వివరాలను తెలుసుకున్నారు. ఈ సందర్భంగా ఆయన మాట్లాడుతూ.. ప్రస్తుతం మండలంలో సుమారు 2,500 మంది కూలీలు ఉపాధి పనుల్లో పాల్గొంటున్నారని తెలిపారు. కూలీలు పని కావాలని కోరిన వెంటనే పనులు కల్పించేందుకు చర్యలు తీసుకుంటామని చెప్పారు. భూగర్భ జలాల పరిరక్షణ, నీటి పొదుపు, భవిష్యత్తులో నీటి భద్రతపై ప్రతి ఒక్కరూ అవగాహన కలిగి ఉండాలని సూచించారు. ప్రతి ఇంటికి ఇంకుడు గుంత, ప్రతి రైతుకు పంట కుంట తప్పనిసరిగా నిర్మించుకునేలా విస్తృత ప్రచారం నిర్వహిస్తున్నట్లు తెలిపారు. వర్షపు నీటిలో ప్రతి చుక్కను భూమిలోకి ఇంకింపజేయడం ద్వారా భూగర్భ జలాలను పెంపొందించుకోవచ్చని వివరించారు. నీటి వనరులను కాపాడుకోవడం ప్రతి ఒక్కరి బాధ్యత అని ఆయన పేర్కొన్నారు. అనంతరం కూలీలతో భూగర్భ జలాల సంరక్షణపై ప్రతిజ్ఞ చేయించి, నీటి పూజ కార్యక్రమాన్ని నిర్వహించారు. కార్యక్రమంలో పంచాయతీ కార్యదర్శి ముషం భవాని, మేట్ వెంకన్న తదితరులు పాల్గొన్నారు.
