స్పెయిన్‌లో గృహ సంక్షోభంపై భారీ నిరసనలు
- రేషన్ కార్డుదారులకు కేంద్రం షాక్ ఆరు నెలలు వాడని కార్డులు బంద్.. - October 4, 2026
- ప్రేమ వ్యవహారంలో ఇద్దరి మృతి - October 4, 2026
- జుట్టు రాలడానికి ఒత్తిడే కారణం! - October 4, 2026
జ్ఞాన తెలంగాణ,అంతర్జాతీయ ప్రతినిధి: స్పెయిన్‌లో గృహ సంక్షోభం తీవ్రరూపం దాల్చడంతో ప్రజాగ్రహం వెల్లువెత్తింది. ఇళ్ల కొరత, అద్దెల భారీ పెరుగుదల, బలవంతపు ఖాళీలకు వ్యతిరేకంగా రాజధాని మాడ్రిడ్‌తో పాటు దేశంలోని సుమారు 50 నగరాల్లో శనివారం పదివేలాది మంది రోడ్లపైకి వచ్చి భారీ నిరసన ప్రదర్శనలు నిర్వహించారు. ప్రభుత్వం ప్రతిపాదించిన గృహ సంక్షోభ నివారణ చర్యలను పార్లమెంట్‌ తిరస్కరించిన మరుసటి రోజే ఈ ఆందోళనలు జరగడం ప్రాధాన్యం సంతరించుకుంది. మాడ్రిడ్‌లో జరిగిన నిరసనలో సుమారు 70 వేల మంది పాల్గొన్నట్లు అధికారులు అంచనా వేశారు. అయితే తమ అంచనా ప్రకారం పాల్గొన్న వారి సంఖ్య మరింత ఎక్కువగా ఉందని నిర్వాహకులు పేర్కొన్నారు. అద్దెలను తగ్గించాలని, అద్దెదారులను బలవంతంగా ఇళ్ల నుంచి ఖాళీ చేయించకుండా కఠినమైన చట్టపరమైన రక్షణ కల్పించాలని నిరసనకారులు డిమాండ్‌ చేశారు. నివాస గృహాలను ఇన్వెస్ట్‌మెంట్‌ ఫండ్లు భారీగా కొనుగోలు చేయడంపై ఆంక్షలు విధించాలని కూడా కోరారు. కొందరు దేశవ్యాప్త సమ్మెకు పిలుపునిచ్చారు. గత నెలలో 87 ఏళ్ల మారికార్మెన్‌ అబాస్కల్‌ను దశాబ్దాలుగా నివసిస్తున్న అపార్ట్‌మెంట్‌ నుంచి ఖాళీ చేయించిన ఘటన ప్రజల్లో తీవ్ర ఆగ్రహానికి కారణమైంది. ఆ భవనాన్ని కొనుగోలు చేసిన ఇన్వెస్ట్‌మెంట్‌ ఫండ్‌ అద్దెను భారీగా పెంచడంతో ఆమె చెల్లించలేకపోయినట్లు సమాచారం. ప్రస్తుతం స్పెయిన్‌లో సుమారు 7 లక్షల ఇళ్ల కొరత ఉన్నట్లు అంచనా. 2025లో దేశవ్యాప్తంగా సగటు అద్దెలు 8.5 శాతం పెరగగా, మాడ్రిడ్‌, బార్సిలోనా వంటి ప్రధాన నగరాల్లో పరిస్థితి మరింత తీవ్రంగా ఉంది. ఇళ్ల విక్రయ ధరలు కూడా గణనీయంగా పెరగడంతో మధ్యతరగతి, తక్కువ ఆదాయ వర్గాలపై ఆర్థిక భారం పెరిగింది. ఈ పరిస్థితిని ఎదుర్కొనేందుకు ప్రధాని పెడ్రో సాంచెజ్‌ నేతృత్వంలోని మైనారిటీ ప్రభుత్వం రెండు కీలక డిక్రీలను పార్లమెంట్‌లో ప్రవేశపెట్టింది. బలహీన వర్గాలకు చెందిన వారిని 2030 వరకు ఇళ్ల నుంచి ఖాళీ చేయించకుండా రక్షించడం, కొన్ని అద్దె ఒప్పందాలను పొడిగించడం వంటి చర్యలు వాటిలో ఉన్నాయి. అయితే పాపులర్‌ పార్టీ, వోక్స్‌, జంట్స్‌ పార్టీలు ప్రతిపాదనలను వ్యతిరేకించడంతో అవి పార్లమెంట్‌లో ఆమోదం పొందలేదు. దీంతో ప్రభుత్వంపై రాజకీయ ఒత్తిడి మరింత పెరిగింది. గృహ సంక్షోభం పరిష్కారంలో ప్రభుత్వం విఫలమైందనే విమర్శలు వినిపిస్తున్న నేపథ్యంలో ముందస్తు ఎన్నికలు రావచ్చనే ఊహాగానాలు కూడా బలపడుతున్నాయి.
