ఫిరాయింపు ఎమ్మెల్యేలకు రాజకీయ గండం!

అసెంబ్లీ ఎన్నికల్లో బీఆర్ఎస్‌ తరఫున గెలిచి అనంతరం కాంగ్రెస్‌లో చేరిన పది మంది ఎమ్మెల్యేల రాజకీయ పరిస్థితి ప్రస్తుతం అగమ్యగోచరంగా మారిందన్న చర్చ రాష్ట్ర రాజకీయాల్లో జోరందుకుంది. అభివృద్ధి పనులకు నిధులు వస్తాయనే ఆశతో అధికార కాంగ్రెస్‌లో చేరిన వారికి ఆశించిన స్థాయిలో ప్రాధాన్యత దక్కడం లేదనే అసంతృప్తి వ్యక్తమవుతోంది. అధికార పార్టీలో పూర్తిస్థాయిలో ఇమడలేక, నియోజకవర్గాల్లో ఇచ్చిన హామీలను అమలు చేయలేక వారు ఇబ్బందులు ఎదుర్కొంటున్నారనే ప్రచారం సాగుతోంది.

దానం నాగేందర్, ప్రకాష్‌గౌడ్, గూడెం మహిపాల్‌రెడ్డి, అరికెపూడి గాంధీ, కాలే యాదయ్య, సంజయ్‌కుమార్, కడియం శ్రీహరి, పోచారం శ్రీనివాస్‌రెడ్డి, తెల్లం వెంకట్రావు, బండ్ల కృష్ణమోహన్‌రెడ్డి బీఆర్ఎస్‌ నుంచి కాంగ్రెస్‌లోకి మారిన ఎమ్మెల్యేలుగా ఉన్నారు. పార్టీ మారిన సమయంలో నియోజకవర్గాల అభివృద్ధికి ప్రభుత్వం నుంచి భారీగా సహకారం లభిస్తుందని వారు ఆశించారు. అయితే నిధుల మంజూరు, పనుల పురోగతి, ప్రభుత్వ పెద్దలతో సమన్వయం వంటి అంశాల్లో ఇబ్బందులు ఎదురవుతున్నాయనే విమర్శలు వినిపిస్తున్నాయి.

ఇటీవల బాన్సువాడలో మాజీ స్పీకర్‌ పోచారం శ్రీనివాస్‌రెడ్డి చేసిన వ్యాఖ్యలు ఈ అసంతృప్తికి మరింత బలం చేకూర్చాయి. ముఖ్యమంత్రి, ఉప ముఖ్యమంత్రి, మంత్రులు, ముఖ్య సలహాదారుల నుంచి స్పందన సరిగా లేకపోవడం, బిల్లులు రాక పనులు నిలిచిపోవడం వంటి అంశాలను ఆయన ప్రస్తావించారు. తాను వ్యక్తిగత ప్రయోజనాల కోసం కాకుండా నియోజకవర్గ అభివృద్ధి కోసమే కాంగ్రెస్‌తో కలిసి పనిచేశానని స్పష్టం చేశారు.

మరోవైపు, ఫిరాయింపు ఎమ్మెల్యేలకు స్థానిక కాంగ్రెస్‌ కేడర్‌తోనూ సయోధ్య కుదరడం లేదనే చర్చ ఉంది. పాత కాంగ్రెస్‌ నాయకత్వం, కొత్తగా వచ్చిన ఎమ్మెల్యేల వర్గాల మధ్య ఆధిపత్య పోరు పలు నియోజకవర్గాల్లో విభేదాలకు దారితీస్తోంది. మండల, పట్టణ కమిటీల ఏర్పాటు నుంచి ప్రోటోకాల్‌ వరకు రెండు వర్గాల మధ్య వివాదాలు కొనసాగుతున్నట్లు రాజకీయ వర్గాలు చెబుతున్నాయి.

ఇదిలా ఉండగా, కొందరు ఫిరాయింపు ఎమ్మెల్యేలు తిరిగి బీఆర్ఎస్‌ వైపు చూస్తున్నారనే ప్రచారం కూడా రాజకీయ వర్గాల్లో ఊపందుకుంది. అయితే ఈ ప్రచారంపై సంబంధిత ఎమ్మెల్యేల నుంచి స్పష్టమైన ధృవీకరణ లేదు. పార్టీ మారిన తర్వాత ప్రజలకు ఇచ్చిన హామీలను నెరవేర్చలేకపోతే రాజకీయంగా తమ భవిష్యత్‌ ఏమిటన్న ఆందోళన వారిలో నెలకొన్నట్లు చర్చ జరుగుతోంది. ఈ నేపథ్యంలో కాంగ్రెస్‌ నాయకత్వం అసంతృప్త ఎమ్మెల్యేలను ఎలా సమన్వయం చేస్తుంది? వారికి నిధులు, ప్రాధాన్యత కల్పిస్తుందా? లేక ఈ పరిణామాలు భవిష్యత్‌లో కొత్త రాజకీయ సమీకరణాలకు దారితీస్తాయా? అన్నది ఆసక్తికరంగా మారింది.