విద్యార్థులపై దాడిపై అమిత్ షా మౌనం ఎందుకు?
Mobile : 80082-06714
- మోదీతో సీడబ్ల్యూజీ విజేతల భేటీ - August 9, 2026
- విద్యార్థులపై దాడిపై అమిత్ షా మౌనం ఎందుకు? - August 9, 2026
- భాగ్యలక్ష్మి ఆలయాన్ని గోల్డెన్ టెంపుల్గా మారుస్తాం - August 9, 2026
జ్ఞానతెలంగాణ,సెంట్రల్ డెస్క్ :
నీట్ పేపర్ లీకేజీకి వ్యతిరేకంగా ఆందోళన చేసిన విద్యార్థులపై పోలీసుల దాడి ఘటనపై కేంద్ర హోంమంత్రి అమిత్ షా స్పందించకపోవడాన్ని లోక్సభ ప్రతిపక్ష నేత రాహుల్ గాంధీ తీవ్రంగా తప్పుబట్టారు. ఈ ఘటనపై అమిత్ షా ఏదో ఒకరోజు సమాధానం చెప్పక తప్పదని అన్నారు. విద్యార్థుల ఆందోళనలను పరిష్కరించాల్సిన కేంద్ర ప్రభుత్వం.. వారిపైనే చర్యలకు దిగడం సమంజసం కాదని విమర్శించారు. విద్యార్థులకు క్షమాపణ చెప్పాల్సిన ప్రధాని నరేంద్ర మోదీ.. అందుకు బదులుగా వారినే క్షమిస్తున్నానని చెప్పడం విడ్డూరంగా ఉందని రాహుల్ వ్యాఖ్యానించారు.
ఉత్తరప్రదేశ్లోని ప్రయాగ్రాజ్లో శనివారం నిర్వహించిన ‘ఛాత్రోంకీ గూంజ్’ కార్యక్రమంలో ఓ విద్యార్థి తనతో పంచుకున్న ఆవేదనను రాహుల్ గాంధీ ఆదివారం ఎక్స్ వేదికగా వెల్లడించారు. పరీక్షకు సిద్ధమయ్యేందుకు కుటుంబానికి ఉన్న భూమిని విక్రయించడంతో పాటు అప్పులు కూడా చేశానని, ఎంతో కష్టపడి చదివినప్పటికీ చివరకు తనకు ఏమీ మిగలలేదని ఆ విద్యార్థి ఆవేదన వ్యక్తం చేసినట్లు రాహుల్ తెలిపారు. ఇప్పుడు తనకు ముందుకు వెళ్లేందుకు దారి కనిపించడం లేదని అతడు చెప్పినట్లు పేర్కొన్నారు.
ఆ విద్యార్థి పరిస్థితిని ప్రస్తావిస్తూ ఇది అతడి వైఫల్యం కాదని రాహుల్ గాంధీ అన్నారు. యువత తమ భవిష్యత్తు కోసం రాత్రింబవళ్లు శ్రమిస్తున్నప్పటికీ వారికి న్యాయం చేయలేని వ్యవస్థే విఫలమైందని విమర్శించారు. పరీక్షల్లో పారదర్శకత లేకపోవడం, పేపర్ లీకేజీలు, నియామక ప్రక్రియలో అవకతవకలు యువత భవిష్యత్తును తీవ్రంగా దెబ్బతీస్తున్నాయని ఆరోపించారు. దేశానికి యువతే వెలుగు అని పేర్కొన్న రాహుల్.. వారి హక్కులు, భవిష్యత్తు కోసం కాంగ్రెస్ పార్టీ అండగా నిలుస్తుందని హామీ ఇచ్చారు.
ఇదిలా ఉండగా, ఇండియన్ యూత్ కాంగ్రెస్ (ఐవైసీ) వ్యవస్థాపక దినోత్సవం సందర్భంగా రాహుల్ గాంధీ సంస్థ సభ్యులకు శుభాకాంక్షలు తెలిపారు. భారతదేశానికి యువతే అతిపెద్ద బలమని పేర్కొన్నారు. యువ భారతీయులు తమ గొంతును వినిపించేందుకు, సమస్యలను లేవనెత్తేందుకు, హక్కులు, కలలు, ఆకాంక్షల కోసం పోరాడేందుకు ఐవైసీ ఒక వేదికగా నిలుస్తోందని అన్నారు. యువతకు వ్యతిరేకంగా పనిచేస్తున్న వ్యవస్థపై ప్రశ్నలు లేవనెత్తడంలోనూ ఐవైసీ ముందుంటుందని ఆయన పేర్కొన్నారు.
1960 ఆగస్టు 9న భారత యువజన కాంగ్రెస్ స్థాపించబడింది. కాంగ్రెస్ పార్టీ యువజన విభాగంగా పనిచేస్తున్న ఐవైసీ.. యువతను రాజకీయ, సామాజిక కార్యక్రమాల్లో భాగస్వాములను చేయడంలో కీలక పాత్ర పోషిస్తోంది. యువత సమస్యలు, ఉపాధి, విద్య, ప్రజాస్వామ్య హక్కులు తదితర అంశాలపై సంస్థ పలు కార్యక్రమాలను నిర్వహిస్తోంది. మహిళల భాగస్వామ్యాన్ని పెంచేందుకు ‘శక్తి సూపర్ షీ’ వంటి కార్యక్రమాలతో పాటు ‘భారత్ జోడో నాయకత్వ కార్యక్రమం’, ‘పెహ్లా ఓటు’, ‘ఇందిరా ఫెలోషిప్’ వంటి కార్యక్రమాలను కూడా నిర్వహిస్తోంది.
ప్రస్తుతం ఐవైసీ అధ్యక్షుడిగా ఉదయ్ భాను చిబ్ కొనసాగుతున్నారు. యువతలో రాజకీయ చైతన్యం పెంచడంతో పాటు వారి సమస్యలను ప్రభుత్వాల దృష్టికి తీసుకెళ్లడమే లక్ష్యంగా సంస్థ పనిచేస్తోందని కాంగ్రెస్ వర్గాలు చెబుతున్నాయి. ఐవైసీ వ్యవస్థాపక దినోత్సవాన్ని పురస్కరించుకుని రాహుల్ గాంధీ చేసిన వ్యాఖ్యలు.. యువత సమస్యలను రాజకీయ అజెండాలో మరింత ముందుకు తీసుకురావాలన్న కాంగ్రెస్ వ్యూహాన్ని స్పష్టం చేస్తున్నాయి.
మరోవైపు ప్రపంచ ఆదివాసీ దినోత్సవం సందర్భంగా దేశంలోని ఆదివాసీ సోదర, సోదరీమణులకు రాహుల్ గాంధీ శుభాకాంక్షలు తెలిపారు. ఆదివాసీలే దేశానికి అసలైన యజమానులని పేర్కొన్నారు. వారి విభిన్న సంస్కృతులు, సంప్రదాయాలు భారతదేశానికి లభించిన అమూల్యమైన వారసత్వ సంపదగా అభివర్ణించారు. భూమి, అటవీ సంపదపై ఆదివాసీల హక్కులను పరిరక్షించాల్సిన అవసరం ఉందన్నారు. వారి అస్తిత్వం, ఆత్మగౌరవం, హక్కుల కోసం జరిగే పోరాటంలో అండగా ఉంటామని హామీ ఇచ్చారు.
నీట్ పేపర్ లీకేజీ నుంచి నిరుద్యోగం, యువత హక్కులు, ఆదివాసీల సమస్యల వరకు వరుసగా కేంద్ర ప్రభుత్వంపై రాహుల్ గాంధీ విమర్శలు చేయడం రాజకీయంగా ప్రాధాన్యం సంతరించుకుంది. ముఖ్యంగా విద్యార్థుల సమస్యలను ప్రత్యక్షంగా ప్రస్తావిస్తూ కేంద్రంపై ఒత్తిడి పెంచే ప్రయత్నం చేస్తున్నారు. పరీక్షా వ్యవస్థలో పారదర్శకత, యువతకు ఉపాధి, విద్యార్థుల భవిష్యత్తు అంశాలను జాతీయ రాజకీయ చర్చలో ప్రధానాంశాలుగా మార్చేందుకు కాంగ్రెస్ ప్రయత్నిస్తోంది.
