వెలిగొండ ప్రాజెక్ట్‌ ఫేజ్‌-1 ప్రారంభం

దోర్నాల: వెలిగొండ ప్రాజెక్ట్‌ ఫేజ్‌-1ను ముఖ్యమంత్రి చంద్రబాబు నాయుడు సోమవారం ఘనంగా ప్రారంభించారు. దోర్నాల మండలం గంటావానిపల్లి వద్ద వెలిగొండ ప్రాజెక్ట్‌ ఫీడర్‌ కెనాల్‌ ప్రాంతానికి చేరుకున్న సీఎం సంప్రదాయబద్ధంగా పూజా కార్యక్రమాల్లో పాల్గొన్నారు. కృష్ణమ్మకు జలహారతి ఇచ్చి, సారె సమర్పించారు. అనంతరం కృష్ణా జలాలను తలపై చల్లుకుని పూజలు నిర్వహించారు. పంచెకట్టుతో సంప్రదాయ వస్త్రధారణలో పాల్గొన్న ముఖ్యమంత్రి కార్యక్రమానికి ప్రత్యేక ఆకర్షణగా నిలిచారు.

అనంతరం వెలిగొండ ప్రాజెక్ట్‌ పైలాన్‌ను ముఖ్యమంత్రి చంద్రబాబు నాయుడు ఆవిష్కరించి ప్రాజెక్టును జాతికి అంకితం చేశారు. ఫీడర్‌ కెనాల్‌ వద్ద గేట్లను ఎత్తి నల్లమలసాగర్‌కు కృష్ణా జలాలను విడుదల చేశారు. స్థానిక రైతులతో బటన్‌ నొక్కించి గేట్లు ఎత్తించిన సీఎం, వారి చేతుల మీదుగా జలాలను సాగర్‌లోకి మళ్లించారు. గేట్లు తెరుచుకున్న వెంటనే కృష్ణా జలాలు పరవళ్లు తొక్కుతూ నల్లమలసాగర్‌ వైపు పరుగులు తీశాయి. దీంతో ప్రాజెక్టు పరిసర ప్రాంతాల్లో పండుగ వాతావరణం నెలకొంది.

వెలిగొండ ప్రాజెక్టు ప్రారంభంతో ఉమ్మడి ప్రకాశం, నెల్లూరు, కడప జిల్లాల్లోని కరవు పీడిత ప్రాంతాలకు భారీ ఊరట లభించనుంది. సాగునీటి కోసం ఏళ్ల తరబడి ఎదురుచూస్తున్న రైతాంగానికి కృష్ణా జలాల విడుదల కొత్త ఆశలను నింపింది. నీటి ప్రవాహంతో కరవు ప్రాంతాల్లో జలకళ సంతరించుకోవడంతో రైతులు ఆనందం వ్యక్తం చేస్తున్నారు. ప్రాజెక్టు ద్వారా సాగు, తాగునీటి అవసరాలకు మరింత భరోసా ఏర్పడుతుందని అధికారులు, స్థానికులు పేర్కొంటున్నారు.

వెలిగొండ ప్రాజెక్టుకు 1996 మార్చి 5న నిర్మాణానికి శ్రీకారం చుట్టిన ముఖ్యమంత్రి చంద్రబాబు నాయుడు, సుమారు మూడు దశాబ్దాల అనంతరం అదే ప్రాజెక్టును పూర్తి చేసి ప్రారంభించడం విశేషంగా నిలిచింది. ఒకప్పుడు కరవు, వలసలు, సాగునీటి కొరతతో ఇబ్బందులు ఎదుర్కొన్న ప్రాంతాలకు ఈ ప్రాజెక్టు కీలకంగా మారనుంది. దీర్ఘకాలంగా కొనసాగిన ప్రాజెక్టు నిర్మాణం పూర్తై కృష్ణా జలాలు తొలిసారిగా నల్లమలసాగర్‌ వైపు మళ్లడంతో రైతుల్లో ఉత్సాహం నెలకొంది.

ఈ చారిత్రక కార్యక్రమంలో ఏపీ బీజేపీ అధ్యక్షుడు మాధవ్‌, మంత్రులు కందుల దుర్గేష్‌, నిమ్మల రామానాయుడు తదితరులు పాల్గొన్నారు. ప్రజాప్రతినిధులు, అధికారులు, స్థానిక రైతులు పెద్ద సంఖ్యలో హాజరై కృష్ణా జలాల విడుదల కార్యక్రమాన్ని వీక్షించారు. వెలిగొండ ప్రాజెక్టు ఫేజ్‌-1 ప్రారంభంతో రాయలసీమ, కోస్తా ప్రాంతాల్లోని కరవు ప్రభావిత ప్రాంతాలకు సాగునీటి లభ్యత మరింత మెరుగుపడే అవకాశం ఏర్పడింది. మూడు దశాబ్దాల నిరీక్షణకు తెరదించుతూ కృష్ణా జలాలు నల్లమలసాగర్‌లోకి ప్రవహించడం ఈ ప్రాంత చరిత్రలో కీలక ఘట్టంగా నిలిచింది.