అమెరికాలో 1.75 లక్షల వీసాలు రద్దు

వాషింగ్టన్‌: అమెరికా అధ్యక్షుడు డొనాల్డ్‌ ట్రంప్‌ నేతృత్వంలోని ప్రభుత్వం విదేశీయుల వీసాల విషయంలో కఠిన వైఖరిని అవలంబిస్తోంది. జాతీయ భద్రత, నేర కార్యకలాపాలు, ఇమ్మిగ్రేషన్‌ నిబంధనల ఉల్లంఘన, మోసపూరిత వ్యవహారాలు తదితర కారణాలతో విదేశీయులకు గతంలో జారీ చేసిన సుమారు 1.75 లక్షలకు పైగా వీసాలను రద్దు చేసినట్లు అమెరికా విదేశాంగ శాఖ వెల్లడించింది. నిరంతర వీసా సమీక్ష ప్రక్రియలో భాగంగానే ఈ చర్యలు చేపట్టినట్లు సోమవారం విడుదల చేసిన ‘ఫ్యాక్ట్‌ షీట్‌’లో పేర్కొంది.

అమెరికాలోకి ప్రవేశించే విదేశీయులపై మరింత కఠినమైన పరిశీలన చేపడుతున్న ట్రంప్‌ ప్రభుత్వం.. వీసా నిబంధనలను ఉల్లంఘించిన వారిపై చర్యలను వేగవంతం చేస్తున్నట్లు తెలుస్తోంది. ముఖ్యంగా అమెరికా చట్టాలను ఉల్లంఘించడం, నేరాలకు పాల్పడటం, తప్పుడు సమాచారం అందించడం, ఇమ్మిగ్రేషన్‌ నిబంధనలను దుర్వినియోగం చేయడం వంటి అంశాలను తీవ్రంగా పరిగణిస్తున్నట్లు విదేశాంగ శాఖ తెలిపింది.

నేరాలకు పాల్పడిన వారిపై వేటు

వీసాల రద్దుకు ప్రధాన కారణాల్లో నేర కార్యకలాపాలు ఒకటిగా అమెరికా ప్రభుత్వం పేర్కొంది. దర్యాప్తు సంస్థల నుంచి అందిన సమాచారం, నేర రికార్డుల ఆధారంగా పెద్ద సంఖ్యలో వీసాలను రద్దు చేసినట్లు వెల్లడించింది. ముఖ్యంగా డ్రైవింగ్‌ అండర్‌ ఇన్‌ఫ్లుయెన్స్‌ (DUI), దాడులు, చోరీలు, మాదకద్రవ్యాల విక్రయం వంటి కేసుల్లో ఉన్నవారిపై చర్యలు తీసుకున్నట్లు తెలిపింది.

అమెరికాలో చట్టాలను ఉల్లంఘించి ప్రజల భద్రతకు ముప్పుగా మారే విదేశీయులను ఎట్టి పరిస్థితుల్లోనూ ఉపేక్షించబోమని ప్రభుత్వం స్పష్టం చేసింది. వీసా మంజూరైన తర్వాత కూడా సంబంధిత వ్యక్తుల కార్యకలాపాలను సమీక్షించే అధికారం తమకు ఉందని పేర్కొంది. దీంతో గతంలో వీసా పొందినప్పటికీ తర్వాత నేరాలకు పాల్పడినవారిపై కూడా చర్యలు తీసుకునే అవకాశం ఉందని స్పష్టమవుతోంది.

తీవ్ర నేరాలపై తక్షణ చర్యలు

అత్యంత తీవ్రమైన నేరాలకు పాల్పడిన విదేశీయుల విషయంలో అమెరికా ప్రభుత్వం మరింత కఠినంగా వ్యవహరిస్తోంది. అత్యాచారం, కిడ్నాపింగ్‌, మానవ అక్రమ రవాణా, చిన్నారులపై లైంగిక వేధింపులు వంటి తీవ్రమైన నేరాలకు సంబంధించిన వ్యక్తుల వీసాలను రద్దు చేసినట్లు విదేశాంగ శాఖ పేర్కొంది.

ఇలాంటి నేరాలు అమెరికా సమాజ భద్రతకు తీవ్ర ముప్పుగా పరిణమించే అవకాశం ఉన్నందున, నేర చరిత్రను ఆధారంగా చేసుకుని వీసా రద్దు ప్రక్రియ చేపడుతున్నట్లు ప్రభుత్వం తెలిపింది. నేరాలకు పాల్పడిన విదేశీయులకు అమెరికాలో ఉండే అవకాశాలను తగ్గించడమే లక్ష్యంగా చర్యలు కొనసాగుతున్నట్లు తెలుస్తోంది.

బర్త్‌ టూరిజంపైనా నిఘా

అమెరికా పౌరసత్వ నిబంధనలను దుర్వినియోగం చేసే ప్రయత్నాలపైనా ట్రంప్‌ ప్రభుత్వం దృష్టి సారించింది. కేవలం తమ పిల్లలకు అమెరికా పౌరసత్వం లభించేలా చేయాలనే ఉద్దేశంతో అమెరికాకు వచ్చే ‘బర్త్‌ టూరిజం’ వ్యవహారాల్లో పాల్గొన్నట్లు ఆరోపణలు ఎదుర్కొంటున్న వారి వీసాలను కూడా రద్దు చేసినట్లు ప్రభుత్వం తెలిపింది.

అమెరికా ఇమ్మిగ్రేషన్‌ వ్యవస్థను ఉద్దేశపూర్వకంగా ఉపయోగించుకునే ప్రయత్నాలను అడ్డుకోవాలని ట్రంప్‌ ప్రభుత్వం భావిస్తోంది. వీసా నిబంధనలను పర్యాటక ప్రయోజనాల పేరుతో దుర్వినియోగం చేసి, వాస్తవానికి వేరే ఉద్దేశంతో అమెరికాలోకి ప్రవేశించే ప్రయత్నాలపై అధికారులు ప్రత్యేకంగా దృష్టి సారిస్తున్నట్లు తెలుస్తోంది.

విదేశాంగ విధానాల ప్రభావం

వీసాల రద్దు చర్యలు కేవలం నేరాలు, ఇమ్మిగ్రేషన్‌ ఉల్లంఘనలకే పరిమితం కాలేదు. అమెరికా విదేశాంగ విధానాలకు సంబంధించిన అంశాలు కూడా ఇందులో భాగమైనట్లు విదేశాంగ మంత్రి మార్కో రూబియో వివరించారు. విదేశాంగ విధానాల దృష్ట్యా క్యూబా, ఇరాన్‌, లావోస్‌, కువైట్‌ దేశాలకు చెందిన పలువురి వీసాలను రద్దు చేసినట్లు ఆయన పేర్కొన్నారు.

దీంతో అమెరికా వీసా విధానం ప్రస్తుతం ఇమ్మిగ్రేషన్‌ వ్యవస్థతో పాటు జాతీయ భద్రత, విదేశాంగ విధానాలతోనూ అనుసంధానమవుతున్నట్లు స్పష్టమవుతోంది. అమెరికా ప్రయోజనాలకు విరుద్ధంగా వ్యవహరిస్తున్నట్లు భావించే వ్యక్తుల విషయంలో కఠిన నిర్ణయాలు తీసుకునేందుకు ప్రభుత్వం సిద్ధంగా ఉందనే సంకేతాలు వెలువడుతున్నాయి.

‘వీసా హక్కు కాదు’

వీసా విషయంలో అమెరికా ప్రభుత్వం అత్యంత స్పష్టమైన సందేశాన్ని ఇచ్చింది. “అమెరికా వీసా అనేది హక్కు కాదు.. అది ఒక ప్రత్యేక అవకాశం మాత్రమే” అని విదేశాంగ శాఖ పేర్కొంది. అమెరికాలోకి ప్రవేశించాలంటే వీసా పొందడం ఒక్కటే సరిపోదని కూడా స్పష్టం చేసింది.

వీసా అనేది అమెరికా భూభాగంలోకి ప్రవేశించేందుకు ముందస్తుగా ఇచ్చే అనుమతి మాత్రమేనని, దేశ సరిహద్దులోకి వచ్చిన తర్వాత ఆ వ్యక్తిని అనుమతించాలా లేదా అనే తుది నిర్ణయం ఇమ్మిగ్రేషన్‌ అధికారులదేనని విదేశాంగ శాఖ వివరించింది. అంటే వీసా ఉన్నంత మాత్రాన అమెరికాలోకి ప్రవేశించే హక్కు స్వయంచాలకంగా లభించదని స్పష్టం చేసింది.

అమెరికా ఇమ్మిగ్రేషన్‌ వ్యవస్థను దుర్వినియోగం చేసే వ్యక్తుల నుంచి దేశ ప్రజలను రక్షించేందుకు భవిష్యత్తులోనూ కఠిన చర్యలు కొనసాగుతాయని ప్రభుత్వం హెచ్చరించింది. నేర కార్యకలాపాలు, మోసాలు, ఇమ్మిగ్రేషన్‌ నిబంధనల ఉల్లంఘన, జాతీయ భద్రతకు సంబంధించిన అంశాలను పరిగణనలోకి తీసుకుని వీసాలపై నిరంతర సమీక్ష కొనసాగుతుందని వెల్లడించింది. దీంతో అమెరికా వెళ్లాలని భావిస్తున్న విదేశీయులు, ముఖ్యంగా వీసా నిబంధనలను ఉల్లంఘించే వారికి ట్రంప్‌ ప్రభుత్వం తాజా నిర్ణయం గట్టి హెచ్చరికగా మారింది.