భాగ్యలక్ష్మి ఆలయాన్ని గోల్డెన్ టెంపుల్గా మారుస్తాం
Designation :Editor
Mobile : 80082-06714
Mobile : 80082-06714
Latest posts by shrikanth nallolla (see all)
- మృతుడి కుటుంబానికి ఉప్పల ట్రస్ట్ ఆర్థిక సహాయం - August 10, 2026
- మోదీతో సీడబ్ల్యూజీ విజేతల భేటీ - August 9, 2026
- విద్యార్థులపై దాడిపై అమిత్ షా మౌనం ఎందుకు? - August 9, 2026
జ్ఞానతెలంగాణ,తెలంగాణ బ్యూరో :
తెలంగాణలో బీజేపీ అధికారంలోకి వస్తే హైదరాబాద్లోని చార్మినార్ భాగ్యలక్ష్మి అమ్మవారి ఆలయాన్ని గోల్డెన్ టెంపుల్గా తీర్చిదిద్దుతామని కేంద్ర మంత్రి బండి సంజయ్ ప్రకటించారు. ప్రతి ఏటా బోనాల ఉత్సవాలను ఎవరూ ఊహించని స్థాయిలో నిధులు కేటాయించి అంగరంగ వైభవంగా నిర్వహిస్తామని తెలిపారు. లాల్దర్వాజ సింహవాహిని అమ్మవారి బోనాల ఉత్సవాల్లో పాల్గొన్న ఆయన.. కాంగ్రెస్ ప్రభుత్వం, బీఆర్ఎస్ నాయకులపై తీవ్రస్థాయిలో విమర్శలు చేశారు.
జీహెచ్ఎంసీ ఎన్నికల సమయంలో తాను చార్మినార్ భాగ్యలక్ష్మి అమ్మవారిని దర్శించుకున్నప్పుడు బీఆర్ఎస్ వర్కింగ్ ప్రెసిడెంట్ కేటీఆర్ తనను హేళన చేశారని బండి సంజయ్ ఆరోపించారు. ఇప్పుడు కేటీఆర్కు జ్ఞానోదయం కావడంతో భాగ్యలక్ష్మి అమ్మవారిని దర్శించుకునేందుకు వస్తున్నారని వ్యాఖ్యానించారు. రాజకీయ ప్రయోజనాల కోసం ఒకప్పుడు ఆలయ దర్శనాలను విమర్శించినవారే ఇప్పుడు అదే ఆలయాల వద్దకు వస్తున్నారని విమర్శించారు.
బీఆర్ఎస్ ప్రభుత్వ హయాంలో లాల్దర్వాజ ఉజ్జయిని మహంకాళి అమ్మవారి ఆలయ అభివృద్ధికి రూ.20 కోట్లు ఇస్తామని హామీ ఇచ్చి కేసీఆర్ మోసం చేశారని బండి సంజయ్ ఆరోపించారు. ప్రజలను మాత్రమే కాకుండా దేవుళ్లను కూడా మోసం చేసిన చరిత్ర కేసీఆర్దేనని తీవ్ర వ్యాఖ్యలు చేశారు. అందుకే బీఆర్ఎస్ను ప్రజలు అధికారానికి దూరం చేశారని అన్నారు.
కాంగ్రెస్ ప్రభుత్వం బోనాల ఉత్సవాలకు కేటాయిస్తున్న నిధులపైనా బండి సంజయ్ ప్రశ్నలు సంధించారు. లాల్దర్వాజ బోనాలకు కేవలం రూ.5.50 లక్షలు మాత్రమే కేటాయించడం ఏమిటని ప్రశ్నించారు. లక్షలాది మంది భక్తులు తరలివచ్చే ఆలయానికి ఇంత తక్కువ మొత్తంతో అభివృద్ధి, భద్రత, మౌలిక సదుపాయాలు ఎలా కల్పిస్తారని నిలదీశారు. ప్రభుత్వం మతపరమైన కార్యక్రమాల విషయంలో వివక్ష చూపుతోందని ఆరోపించారు.
రంజాన్కు రూ.33 కోట్లు కేటాయించి, అధిక సంఖ్యలో ప్రజలు సందర్శించే హిందూ ఆలయాలకు తక్కువ మొత్తంలో నిధులు కేటాయించడం సరికాదని బండి సంజయ్ అన్నారు. పాతబస్తీలో పన్నులు చెల్లిస్తున్న ప్రజలందరికీ సమానంగా అభివృద్ధి ఫలాలు అందాలని పేర్కొన్నారు. ఆలయాల అభివృద్ధి కోసం ప్రశ్నిస్తే తనను మతతత్వవాదిగా ముద్ర వేస్తున్నారని ఆగ్రహం వ్యక్తం చేశారు. పాతబస్తీ అభివృద్ధిలో హిందువుల పాత్రను విస్మరించరాదని అన్నారు.
హిందూ సమాజం సంఘటితంగా ఉండాల్సిన అవసరం ఉందని బండి సంజయ్ పిలుపునిచ్చారు. కాంగ్రెస్, బీఆర్ఎస్ పార్టీలకు వ్యతిరేకంగా ప్రజలు ఐక్యంగా నిలబడాలని అన్నారు. ముఖ్యంగా జెన్-జీ తరం యువత ఉద్యమ స్ఫూర్తితో పాటు ఆధ్యాత్మిక విలువలను అర్థం చేసుకోవాలని సూచించారు. హిందూ సమాజం కోసం యువత చైతన్యంతో ముందుకు రావాలని పిలుపునిచ్చారు.
బీజేపీ తెలంగాణలో అధికారంలోకి వస్తే పాతబస్తీలో బోనాల ఉత్సవాలను మరింత ఘనంగా నిర్వహిస్తామని బండి సంజయ్ స్పష్టం చేశారు. భక్తులకు అవసరమైన మౌలిక సదుపాయాలు, భద్రత, పారిశుద్ధ్యం వంటి అంశాలకు ప్రత్యేక ప్రాధాన్యం ఇస్తామని చెప్పారు. ఉత్సవాల నిర్వహణకు భారీగా నిధులు కేటాయిస్తామని ప్రకటించారు. చార్మినార్ సమీపంలోని భాగ్యలక్ష్మి అమ్మవారి ఆలయాన్ని గోల్డెన్ టెంపుల్ స్థాయిలో అభివృద్ధి చేస్తామని హామీ ఇచ్చారు.
సనాతన ధర్మం కోసం పాటుపడే యువతకు మరింత శక్తి, ఆత్మవిశ్వాసం కలగాలని సింహవాహిని అమ్మవారిని ప్రార్థిస్తున్నానని బండి సంజయ్ పేర్కొన్నారు. బోనాల పండుగ తెలంగాణ సంస్కృతి, భక్తి సంప్రదాయాలకు ప్రతీకగా నిలుస్తోందని, దాని వైభవాన్ని మరింత పెంచేందుకు ప్రభుత్వం చొరవ చూపాలని అన్నారు. ఆలయాల అభివృద్ధి, పండుగల నిర్వహణకు నిధుల కేటాయింపు అంశం రాజకీయంగా కూడా ప్రాధాన్యం సంతరించుకుంటున్న నేపథ్యంలో బండి సంజయ్ వ్యాఖ్యలు రాష్ట్ర రాజకీయాల్లో చర్చకు దారితీశాయి.
