తెలంగాణ ప్రాజెక్టులపై సమీక్ష ఎజెండా ఉపసంహరించాలి : హరీశ్‌రావు

జ్ఞానతెలంగాణ,స్టేట్ బ్యూరో :
కేంద్ర ప్రభుత్వం నుంచి అన్ని రకాల చట్టబద్ధ అనుమతులు, సాంకేతిక క్లియరెన్స్‌లు పొందిన తెలంగాణకు చెందిన కీలక సాగునీటి ప్రాజెక్టులను మళ్లీ సమీక్షించే అంశాన్ని గోదావరి నదీ యాజమాన్య బోర్డు (జీఆర్‌ఎంబీ) సమావేశ ఎజెండాలో చేర్చడాన్ని మాజీ మంత్రి, బీఆర్‌ఎస్ శాసనసభ ఉపనేత హరీశ్‌రావు తీవ్రంగా వ్యతిరేకించారు. ఈ మేరకు కేంద్ర జలశక్తి మంత్రికి, కేంద్ర జలశక్తి శాఖ కార్యదర్శికి రాసిన లేఖను ఆయన విడుదల చేశారు. ఇప్పటికే కేంద్ర ప్రభుత్వ అత్యున్నత సంస్థలు అన్ని కోణాల్లో పరిశీలించి ఆమోదం తెలిపిన ప్రాజెక్టులను మరోసారి సమీక్షించడం చట్టబద్ధ ప్రక్రియను ప్రశ్నార్థకం చేయడమేనని ఆయన అభిప్రాయపడ్డారు. జీఆర్‌ఎంబీ ఎజెండాలో చేర్చిన ఈ అంశాలను వెంటనే ఉపసంహరించుకోవాలని, తెలంగాణ సాగునీటి ప్రయోజనాలను దెబ్బతీసే ఎలాంటి నిర్ణయాలకు తావివ్వొద్దని కేంద్రాన్ని కోరారు. అలాగే సుదీర్ఘకాలంగా పెండింగ్‌లో ఉన్న సమ్మక్క సాగర్ ఎత్తిపోతల పథకానికి మిగిలిన అన్ని చట్టబద్ధ అనుమతులను వెంటనే మంజూరు చేయాలని డిమాండ్ చేశారు.
తెలంగాణలో నిర్మితమవుతున్న పలు ప్రధాన సాగునీటి ప్రాజెక్టులకు సంబంధించిన సాంకేతిక, హైడ్రోలాజికల్, ఇంజినీరింగ్, పర్యావరణ, చట్టపరమైన అంశాలను కేంద్ర జల సంఘం (సెంట్రల్ వాటర్ కమిషన్), జలశక్తి మంత్రిత్వ శాఖతో పాటు సంబంధిత నిపుణుల కమిటీలు క్షుణ్ణంగా పరిశీలించిన తర్వాతే టెక్నికల్ అడ్వైజరీ కమిటీ ఆమోదం తెలిపిందని హరీశ్‌రావు గుర్తుచేశారు. అనుమతుల ప్రక్రియలో అనేక దశలను పూర్తి చేసి, అన్ని ప్రమాణాలను సంతృప్తిపరిచిన తర్వాతే ఈ ప్రాజెక్టులకు కేంద్ర ప్రభుత్వం అధికారిక అనుమతులు ఇచ్చిందని పేర్కొన్నారు. అలాంటి ప్రాజెక్టులను తిరిగి సమీక్షకు తీసుకురావడం వల్ల పరిపాలనా వ్యవస్థపై అనవసర అనిశ్చితి నెలకొంటుందని, చట్టబద్ధంగా పూర్తయిన ప్రక్రియపై మళ్లీ సందేహాలు సృష్టించడం సరైన విధానం కాదని అభిప్రాయపడ్డారు. ఇది భవిష్యత్తులో రాష్ట్రాల అభివృద్ధి ప్రాజెక్టులపై కూడా ప్రతికూల ప్రభావం చూపే ప్రమాదం ఉందని హెచ్చరించారు.

కేంద్ర ప్రభుత్వ అత్యున్నత సంస్థలు చట్టబద్ధంగా ఇచ్చిన అనుమతులను గోదావరి నదీ యాజమాన్య బోర్డు వంటి కింది స్థాయి సంస్థ సమీక్షించే అధికారం లేదని హరీశ్‌రావు స్పష్టం చేశారు. ఇప్పటికే జలశక్తి మంత్రిత్వ శాఖ తీసుకున్న నిర్ణయాలను తిరిగి పరిశీలించే అవకాశాన్ని జీఆర్‌ఎంబీకి కల్పిస్తే, అది కేంద్ర ప్రభుత్వ సంస్థల నిర్ణయాధికారాన్ని బలహీనపరిచినట్లే అవుతుందని ఆయన ఆందోళన వ్యక్తం చేశారు. దేశంలో చట్టబద్ధ సంస్థల నిర్ణయాలకు గౌరవం ఉండాలంటే ఇప్పటికే ఆమోదం పొందిన అంశాలను మళ్లీ వివాదాస్పదం చేయరాదన్నారు. పరిపాలనా వ్యవస్థలో స్పష్టత, స్థిరత్వం ఉండాల్సిన సమయంలో ఇలాంటి చర్యలు అభివృద్ధి ప్రాజెక్టుల అమలును ఆలస్యం చేసే ప్రమాదం ఉందని పేర్కొన్నారు. రాష్ట్రాల మధ్య నీటి అంశాల పరిష్కారంలో పారదర్శకత, చట్టబద్ధత, సమన్వయం తప్పనిసరి అని ఆయన సూచించారు.
కాళేశ్వరం, చౌటుపల్లి హనుమంత్ రెడ్డి, ముక్తేశ్వరం, చనాక–కొరట, మోడికుంటవాగు, కడెం–గూడెం, సీతారామ ఎత్తిపోతల పథకం వంటి తెలంగాణకు అత్యంత కీలకమైన ప్రాజెక్టులు సుదీర్ఘ పరిశీలన అనంతరం కేంద్ర అనుమతులు పొందాయని హరీశ్‌రావు గుర్తు చేశారు. ఇప్పుడు వాటిని మళ్లీ సమీక్షించాలని ఎజెండాలో చేర్చడం రాష్ట్ర ప్రయోజనాలకు విరుద్ధమని పేర్కొన్నారు. ఈ నిర్ణయం అమల్లోకి వస్తే తెలంగాణలో సాగునీటి అభివృద్ధి తీవ్రంగా దెబ్బతింటుందని, వేల కోట్ల రూపాయల ప్రజాధనం, ఇప్పటికే పూర్తయిన పనులు, భవిష్యత్ ప్రణాళికలపై ప్రతికూల ప్రభావం పడే అవకాశం ఉందని హెచ్చరించారు. ముఖ్యంగా రైతులకు సాగునీటి అందుబాటు, తాగునీటి భద్రత, వ్యవసాయ రంగ అభివృద్ధిపై తీవ్ర ప్రభావం చూపే ప్రమాదం ఉందన్నారు. కోట్లాది మంది రైతుల జీవనోపాధికి సంబంధించిన అంశాల్లో అనవసర జాప్యం రాష్ట్ర ఆర్థిక వ్యవస్థపై కూడా ప్రతికూల ప్రభావం చూపుతుందని తెలిపారు.

సెంట్రల్ వాటర్ కమిషన్ నుంచి ఇప్పటికే హైడ్రోలాజికల్ అనుమతులు పొందిన సమ్మక్క సాగర్ ఎత్తిపోతల పథకానికి మిగిలిన చట్టబద్ధ అనుమతులను వెంటనే మంజూరు చేయాలని హరీశ్‌రావు కేంద్ర ప్రభుత్వాన్ని కోరారు. తెలంగాణకు రావాల్సిన నీటి హక్కులను పరిరక్షించడంలో కేంద్ర ప్రభుత్వం న్యాయబద్ధంగా వ్యవహరిస్తుందనే విశ్వాసం తనకు ఉందని లేఖలో పేర్కొన్నారు. రాష్ట్ర ప్రజల ప్రయోజనాలు, సాగునీటి అవసరాలు, రైతుల భవిష్యత్తును దృష్టిలో ఉంచుకొని జీఆర్‌ఎంబీ ఎజెండాలో చేర్చిన సమీక్ష అంశాలను వెంటనే ఉపసంహరించుకోవాలని విజ్ఞప్తి చేశారు. ఇప్పటికే అనుమతులు పొందిన ప్రాజెక్టులను తిరిగి సమీక్షించడం కాకుండా, పెండింగ్‌లో ఉన్న ప్రాజెక్టులకు వేగంగా అనుమతులు మంజూరు చేసి తెలంగాణ సాగునీటి అభివృద్ధికి కేంద్రం పూర్తి సహకారం అందించాలని హరీశ్‌రావు తన లేఖలో కోరారు