మృతి చెందిన కానిస్టేబుల్ కుటుంబానికి రూ.1 కోటి బీమా చెక్కు

• డీజీపీ సి.వి. ఆనంద్ చేతుల మీదుగా అందజేత
• విధి నిర్వహణలో ప్రమాదానికి గురైన కానిస్టేబుల్
• ఈగల్ ఫోర్స్, ఎస్‌బీఐ సమన్వయంతో బీమా క్లెయిమ్ పూర్తి
• కుటుంబానికి ఆర్థిక భరోసా కల్పించిన పోలీసు శాఖ
• కుటుంబ సభ్యులకు డీజీపీ ప్రగాఢ సానుభూతి

హైదరాబాద్, ఆగస్టు 3: విధి నిర్వహణలో రోడ్డు ప్రమాదానికి గురై అనంతరం మృతిచెందిన రాచకొండ కమిషనరేట్‌కు చెందిన ఏఆర్ కానిస్టేబుల్ వి. చరణ్‌కుమార్ కుటుంబ సభ్యులకు రాష్ట్ర డీజీపీ సి.వి. ఆనంద్ రూ.1 కోటి బీమా చెక్కును అందజేశారు. పోలీసు శాఖ తరఫున కుటుంబ సభ్యులకు ప్రగాఢ సానుభూతి వ్యక్తం చేస్తూ, వారి కుటుంబానికి అండగా ఉంటామని హామీ ఇచ్చారు.

మల్కాజిగిరి కమిషనరేట్ 2018 బ్యాచ్‌కు చెందిన కానిస్టేబుల్ చరణ్‌కుమార్ ఈగల్ ఫోర్స్‌లో డిప్యూటేషన్‌పై విధులు నిర్వహిస్తున్నారు. 2025 సెప్టెంబర్ 22-23 తేదీల అర్ధరాత్రి విధులు ముగించుకుని తిరిగి వస్తుండగా మహారాష్ట్రలోని దేవార్కర్ గ్రామ సమీపంలో జరిగిన రోడ్డు ప్రమాదంలో తీవ్రంగా గాయపడ్డారు. ప్రమాదంలో ఆయన కుడికాలుతో పాటు తలకు తీవ్ర గాయాలు కావడంతో స్థానికంగా ప్రథమ చికిత్స అందించి, అనంతరం హైదరాబాద్‌లోని యశోద ఆసుపత్రికి తరలించి మెరుగైన వైద్యం అందించారు.

వైద్యుల సూచనల మేరకు ఆయనకు ప్లాస్టిక్ సర్జరీ నిర్వహించారు. చికిత్స అనంతరం 2025 అక్టోబర్ 28న ఆసుపత్రి నుంచి డిశ్చార్జ్ అయిన చరణ్‌కుమార్ ఇంటికి చేరుకున్న కొద్దిసేపటికే అకస్మాత్తుగా అస్వస్థతకు గురై కుప్పకూలిపోయారు. వెంటనే కుటుంబ సభ్యులు మళ్లీ యశోద ఆసుపత్రికి తరలించగా, వైద్యులు ఆయన మృతిచెందినట్లు నిర్ధారించారు.

మృతుడి కుటుంబానికి ఆర్థిక భరోసా కల్పించేందుకు ఈగల్ ఫోర్స్ డైరెక్టర్ సందీప్ షాండిల్య, ఎస్పీ రఘువీర్, అదనపు ఎస్పీ కృష్ణమూర్తి తదితర అధికారులు స్టేట్ బ్యాంక్ ఆఫ్ ఇండియాతో (ఎస్‌బీఐ) సమన్వయం చేసి బీమా క్లెయిమ్ ప్రక్రియను వేగంగా పూర్తి చేశారు. దీంతో రూ.1 కోటి బీమా మొత్తాన్ని కుటుంబ సభ్యులకు అందజేయడం సాధ్యమైంది.

ఈ సందర్భంగా డీజీపీ సి.వి. ఆనంద్ మాట్లాడుతూ, విధి నిర్వహణలో ప్రాణాలు కోల్పోయిన పోలీసు సిబ్బంది కుటుంబాలకు అండగా నిలవడం పోలీసు శాఖ బాధ్యత అని పేర్కొన్నారు. కానిస్టేబుల్ చరణ్‌కుమార్ సేవలను స్మరించుకుంటూ ఆయన కుటుంబ సభ్యులకు ప్రగాఢ సానుభూతి తెలిపారు. పోలీసు సిబ్బంది సంక్షేమానికి ప్రభుత్వం, పోలీసు శాఖ ఎల్లప్పుడూ ప్రాధాన్యం ఇస్తుందని, ఇలాంటి సంక్షేమ చర్యలు భవిష్యత్తులో కూడా కొనసాగుతాయని డీజీపీ స్పష్టం చేశారు.