బీజేపీ నేతలకు డిగ్రీల బహిరంగ సవాల్

• స్కాలర్‌షిప్, విద్యా రుణ వివరాలు వెల్లడిస్తానన్న దీప్కే
• బోస్టన్ యూనివర్సిటీ చదువుపై వివరణ

---

న్యూఢిల్లీ, ఆగస్టు 3: తన విద్యార్హతలకు సంబంధించిన వివరాలను సమాచార హక్కు చట్టం (ఆర్టీఐ) ద్వారా కోరడంపై కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దీప్కే స్పందించారు. తన విద్యకు సంబంధించిన అన్ని వివరాలను వెల్లడించేందుకు సిద్ధంగా ఉన్నానని స్పష్టం చేసిన ఆయన, అదే సమయంలో బీజేపీ నాయకులు కూడా తమ విద్యార్హతలు, డిగ్రీలను ప్రజల ముందుకు తీసుకురావాలని సవాల్ విసిరారు. తనపై ఆర్టీఐ దాఖలు చేసిన బీజేపీ కార్యకర్తకు సమాధానంగా ఈ వ్యాఖ్యలు చేసినట్లు తెలిపారు.

తన బోస్టన్ యూనివర్సిటీ స్కాలర్‌షిప్ లేఖతో పాటు విద్యా రుణానికి సంబంధించిన పత్రాలను కూడా బహిరంగపరచడానికి సిద్ధంగా ఉన్నానని అభిజీత్ పేర్కొన్నారు. అయితే తన విద్య గురించి ప్రశ్నించే వారు ముందు తమ నాయకుల విద్యార్హతలను కూడా ప్రజలకు తెలియజేయాలని అన్నారు. ఈ సందర్భంగా ప్రధాని నరేంద్ర మోదీ విద్యార్హతలపై గతంలో జరిగిన చర్చలను పరోక్షంగా ప్రస్తావిస్తూ, “మీ నాయకులు కూడా తమ డిగ్రీలను చూపిస్తారా?” అని ప్రశ్నించారు.

ఒక సాధారణ యువకుడు విదేశాల్లోని ప్రముఖ బోస్టన్ యూనివర్సిటీలో చదవడం ఎందుకు కొందరికి సమస్యగా మారిందో అర్థం కావడం లేదని ఆయన అన్నారు. విద్యను రాజకీయ అంశంగా మార్చడం సరైన విధానం కాదని పేర్కొన్నారు. విద్య పట్ల వ్యతిరేక ధోరణి ఎందుకు కనిపిస్తోందని ప్రశ్నిస్తూ, తన విద్యా ప్రయాణం పూర్తిగా పారదర్శకంగా జరిగిందని తెలిపారు.

తన ఉన్నత విద్య కోసం బోస్టన్ యూనివర్సిటీ నుంచి స్కాలర్‌షిప్ పొందడంతో పాటు విద్యా రుణం కూడా తీసుకున్నానని, ఆ రుణాన్ని నిబంధనల ప్రకారం తిరిగి చెల్లించాల్సి ఉంటుందని వివరించారు. తన విద్యకు సంబంధించిన ప్రతి పత్రాన్ని ఎవరైనా పరిశీలించవచ్చని, తనకు దాచిపెట్టాల్సిన అవసరం లేదని స్పష్టం చేశారు. ప్రజల ముందు నిజాలను ఉంచేందుకు తాను ఎప్పుడూ సిద్ధంగా ఉంటానని పేర్కొన్నారు.

నీట్ ప్రశ్నపత్రం లీక్ వివాదంపై దేశవ్యాప్తంగా జరిగిన నిరసన ఉద్యమంలో పాల్గొనేందుకు జూన్ నెలలో భారత్‌కు తిరిగి వచ్చిన విషయాన్ని కూడా అభిజీత్ గుర్తుచేశారు. యువతకు నాణ్యమైన విద్య, పారదర్శక పరీక్షల నిర్వహణ ఎంతో ముఖ్యమని ఆయన అన్నారు. ప్రస్తుతం తన విద్యార్హతలపై వస్తున్న ప్రశ్నలను రాజకీయ కోణంలోనే చూస్తున్నట్లు పేర్కొంటూ, ప్రజా జీవితంలో ఉన్న ప్రతి ఒక్కరూ ఒకే ప్రమాణాలతో పారదర్శకత పాటించాలని ఆయన అభిప్రాయపడ్డారు. రాజకీయ నాయకులు ప్రజల విశ్వాసాన్ని నిలబెట్టుకోవాలంటే తమ విద్యార్హతలతో పాటు ప్రజా జీవితానికి సంబంధించిన అంశాల్లోనూ స్పష్టత చూపాలని ఆయన సూచించారు.