తెలంగాణ కొత్త సీఎస్‌గా సంజయ్ జాజు బాధ్యతల స్వీకారం

జ్ఞానతెలంగాణ,స్టేట్ డెస్క్ :

తెలంగాణ రాష్ట్ర ప్రభుత్వ కొత్త ప్రధాన కార్యదర్శి (చీఫ్ సెక్రటరీ)గా సీనియర్ ఐఏఎస్ అధికారి సంజయ్ జాజు మంగళవారం అధికారికంగా బాధ్యతలు స్వీకరించారు. బాధ్యతలు చేపట్టే ముందు హైదరాబాద్‌లోని ఎంసీఆర్ హెచ్‌ఆర్‌డీ సంస్థలో ఉన్న బోధి పెవిలియన్‌లో ముఖ్యమంత్రి రేవంత్ రెడ్డిని మర్యాదపూర్వకంగా కలిశారు. అనంతరం మాజీ ప్రధాన కార్యదర్శి కె. రామకృష్ణారావుతో కలిసి రాష్ట్ర సచివాలయానికి చేరుకుని అధికారికంగా సీఎస్‌గా బాధ్యతలు చేపట్టారు. ఈ సందర్భంగా పలువురు ఐఏఎస్, ఐపీఎస్ అధికారులు, వివిధ ప్రభుత్వ శాఖల ఉన్నతాధికారులు సంజయ్ జాజుకు శుభాకాంక్షలు తెలియజేసి కొత్త బాధ్యతల్లో విజయవంతం కావాలని ఆకాంక్షించారు. రాష్ట్ర పరిపాలనలో విస్తృత అనుభవం కలిగిన సంజయ్ జాజు నియామకం ప్రభుత్వ యంత్రాంగానికి మరింత బలం చేకూరుస్తుందని అధికారులు అభిప్రాయపడుతున్నారు. మధ్యప్రదేశ్‌కు చెందిన తెలంగాణ కేడర్ ఐఏఎస్ అధికారి అయిన సంజయ్ జాజు 2029 ఫిబ్రవరి వరకు సర్వీసులో కొనసాగనున్నారు. ఉమ్మడి ఆంధ్రప్రదేశ్‌లో జిల్లా స్థాయి నుంచి రాష్ట్రస్థాయి వరకు, అనంతరం కేంద్ర ప్రభుత్వంలో అత్యున్నత హోదాల్లో పనిచేసిన ఆయనకు పరిపాలన, ప్రణాళిక, మౌలిక వసతులు, ఐటీ, డిజిటల్ గవర్నెన్స్, రక్షణ, సమాచార ప్రసార రంగాల్లో విశేష అనుభవం ఉంది. ప్రజలకు ప్రభుత్వ సేవలను సులభంగా అందించే లక్ష్యంతో అమలు చేసిన ‘మీ సేవ’ ప్రాజెక్టును ప్రజలకు చేరువ చేయడంలో సంజయ్ జాజు కీలక పాత్ర పోషించారు. ఉమ్మడి ఆంధ్రప్రదేశ్‌లో ఐటీ మరియు ఈ-గవర్నెన్స్ శాఖ కార్యదర్శిగా పనిచేసిన సమయంలో ప్రభుత్వ సేవలను డిజిటల్ విధానంలో అందించేందుకు ఆయన తీసుకున్న చర్యలు దేశవ్యాప్తంగా ప్రశంసలు పొందాయి. మెకానికల్ ఇంజినీరింగ్‌లో ఎంటెక్, ఎంబీఏ (ఫైనాన్స్) పూర్తి చేసిన సంజయ్ జాజు తన కెరీర్ ప్రారంభంలో విజయవాడ సబ్ కలెక్టర్‌గా, అనంతరం పశ్చిమ గోదావరి జిల్లా కలెక్టర్‌గా సేవలందించారు. అలాగే హైదరాబాద్, విశాఖపట్నం మున్సిపల్ కార్పొరేషన్ల కమిషనర్‌గా పనిచేసి పట్టణాభివృద్ధికి విశేష కృషి చేశారు. ఉమ్మడి ఆంధ్రప్రదేశ్ ఇన్‌ఫ్రాస్ట్రక్చర్ కార్పొరేషన్ మేనేజింగ్ డైరెక్టర్‌గా, పౌర సరఫరాల శాఖ కమిషనర్‌గా కూడా పలు సంస్కరణలు అమలు చేశారు. తెలంగాణ రాష్ట్రం ఏర్పడిన తర్వాత కేంద్ర సర్వీసుల్లో కొనసాగిన సంజయ్ జాజు 2014 నుంచి 2018 వరకు జాతీయ రహదారుల అభివృద్ధి సంస్థలో డైరెక్టర్‌గా సేవలందించారు. ఆయన నాయకత్వంలో నేషనల్ హైవేస్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ పూర్తిస్థాయి డిజిటల్ వ్యవస్థగా రూపాంతరం చెందింది. ఈ కృషికి గుర్తింపుగా జాతీయ ఈ-గవర్నెన్స్ గోల్డ్ అవార్డు కూడా లభించింది. అనంతరం కేంద్ర రక్షణ శాఖలో జాయింట్ సెక్రటరీ, అదనపు కార్యదర్శిగా ఐదేళ్లపాటు కీలక బాధ్యతలు నిర్వహించారు. తరువాత యూనియన్ సెక్రటరీ హోదాకు పదోన్నతి పొంది సమాచార, ప్రసార మంత్రిత్వ శాఖ కార్యదర్శిగా పనిచేస్తూ పలు విధానపరమైన నిర్ణయాల్లో కీలక పాత్ర పోషించారు. గత రెండేళ్లుగా ఈశాన్య ప్రాంతాల అభివృద్ధి శాఖ కార్యదర్శిగా సేవలందించిన సంజయ్ జాజు ఇటీవల తెలంగాణ కేడర్‌కు తిరిగి వచ్చారు. రాష్ట్ర ప్రభుత్వం ఆయన అనుభవాన్ని దృష్టిలో ఉంచుకుని ప్రధాన కార్యదర్శి బాధ్యతలతో పాటు పలు కీలక అదనపు బాధ్యతలను కూడా అప్పగించింది. ఐటీ మరియు పరిశ్రమల శాఖ ప్రత్యేక ప్రధాన కార్యదర్శిగా కొనసాగడంతో పాటు, ముఖ్యమంత్రి కార్యాలయంలో ఏర్పాటు చేసిన స్పీడ్ (SPEED) విభాగం సీఈవోగా కూడా బాధ్యతలు నిర్వహించనున్నారు. ప్రభుత్వ ప్రధాన ప్రాజెక్టుల అమలు, పర్యవేక్షణ, వేగవంతమైన నిర్ణయాలు, శాఖల మధ్య సమన్వయానికి ఈ విభాగం కీలకంగా పనిచేయనుంది. అదేవిధంగా సీఎంవోలోని ఇండస్ట్రీ అండ్ ఇన్వెస్ట్‌మెంట్ సెల్ ప్రత్యేక ప్రధాన కార్యదర్శిగా కూడా సంజయ్ జాజు వ్యవహరించనున్నారు. పరిశ్రమల పెట్టుబడులను ఆకర్షించడం, రాష్ట్రంలో పారిశ్రామికాభివృద్ధిని వేగవంతం చేయడం, పెట్టుబడిదారులకు అనుకూల వాతావరణం కల్పించడం వంటి అంశాలపై ఆయన ప్రత్యేక దృష్టి సారించనున్నట్లు అధికార వర్గాలు భావిస్తున్నాయి. డిజిటల్ పరిపాలన, సమర్థవంతమైన పాలనా అనుభవం, కేంద్ర-రాష్ట్ర స్థాయిల్లో పనిచేసిన విశేష అనుభవం, ప్రజాకేంద్రీకృత దృక్పథం కలిగిన సంజయ్ జాజు నాయకత్వంలో తెలంగాణ పరిపాలన మరింత సమర్థవంతంగా, పారదర్శకంగా, సాంకేతిక ఆధారితంగా ముందుకు సాగుతుందనే ఆశాభావం ప్రభుత్వ వర్గాల్లో వ్యక్తమవుతోంది.