15వ వార్డులో కాంగ్రెస్ టికెట్కు కృతజ్ఞతలు తెలిపిన సాతా ప్రవీణ్ కుమార్
జ్ఞాన తెలంగాణ, శంకర్పల్లి ప్రతినిధి:
శంకర్పల్లి మున్సిపాలిటీ పరిధిలోని 15వ వార్డులో కాంగ్రెస్ పార్టీ అభ్యర్థిగా బీఫామ్ అందించి తనపై విశ్వాసం ఉంచిన పార్టీ రాష్ట్ర, జిల్లా, నియోజకవర్గ, మండల, మున్సిపాలిటీ స్థాయి నాయకత్వానికి సాతా ప్రవీణ్ కుమార్ హృదయపూర్వక కృతజ్ఞతలు తెలిపారు. పార్టీ సిద్ధాంతాల పట్ల తన నిబద్ధతను, ప్రజాసేవ పట్ల తన అంకితభావాన్ని గుర్తించి ఈ కీలక బాధ్యత అప్పగించిన నాయకత్వానికి వినయపూర్వక అభివాదం చేస్తున్నట్లు ఆయన వెల్లడించారు. ఈ అవకాశాన్ని వ్యక్తిగత గౌరవంగా కాకుండా ప్రజల పట్ల ఉన్న బాధ్యతగా భావిస్తున్నానని స్పష్టం చేశారు.
అలాగే మండల, మున్సిపాలిటీ సీనియర్ నాయకులు, గ్రామ పెద్దలు, వార్డు సభ్యులు, పార్టీ కార్యకర్తలు, మిత్రులు, శ్రేయోభిలాషులు అందించిన ప్రోత్సాహం తనపై మరింత బాధ్యతను మోపిందని ఆయన పేర్కొన్నారు. తనపై ఉంచిన నమ్మకాన్ని మాటలతో కాకుండా ప్రజల సేవ ద్వారా, అభివృద్ధి కార్యాచరణ ద్వారా, ఎన్నికల విజయంతో నిరూపిస్తానని సాతా ప్రవీణ్ కుమార్ స్పష్టం చేశారు. పార్టీ కోసం క్షేత్రస్థాయిలో అహర్నిశలు శ్రమించి, ప్రతి కార్యకర్తతో సమన్వయంతో ముందుకు సాగుతానని తెలిపారు.
కాంగ్రెస్ పార్టీ గెలుపే ప్రధాన లక్ష్యంగా 15వ వార్డులో సమగ్ర కార్యాచరణను అమలు చేస్తానని ఆయన ప్రకటించారు. పార్టీ విధానాలు, ప్రజాహిత కార్యక్రమాలు ప్రతి ఇంటికి చేరేలా బలమైన ప్రచారం నిర్వహిస్తానని, ప్రజలతో ప్రత్యక్షంగా మమేకమై వారి సమస్యలను గుర్తించి పరిష్కార దిశగా కృషి చేస్తానని చెప్పారు. మౌలిక వసతుల అభివృద్ధి, పారిశుద్ధ్య వ్యవస్థ బలోపేతం, తాగునీటి సౌకర్యాల మెరుగుదల, రహదారుల అభివృద్ధి, పారదర్శక పాలన తన ప్రధాన కార్యాచరణ అజెండాగా ఉంటాయని వెల్లడించారు.
గ్రామ ప్రజలు, వార్డు సభ్యులు, పార్టీ కార్యకర్తలు అందరూ కలిసికట్టుగా పనిచేస్తేనే ఆశించిన విజయం సాధ్యమని ఆయన అభిప్రాయపడ్డారు. రాబోయే మున్సిపాలిటీ ఎన్నికల్లో తనను భారీ మెజార్టీతో గెలిపించి, కాంగ్రెస్ పార్టీకి బలమైన విజయాన్ని అందించాలని ప్రజలకు సాతా ప్రవీణ్ కుమార్ పిలుపునిచ్చారు. ప్రజల ఆశీర్వాదాలతో 15వ వార్డును అభివృద్ధికి ఆదర్శంగా నిలిపేందుకు అహర్నిశలు శ్రమిస్తానని ఆయన ధీమా వ్యక్తం చేశారు.
