టాస్‌తో పదోతరగతి పాస్‌కు గ్రీన్‌సిగ్నల్

by shrikanth nallolla · June 29, 2026

జ్ఞానతెలంగాణ, విద్యాసమాచారం :
రాష్ట్రంలో పదో తరగతి ఉత్తీర్ణత శాతాన్ని వంద శాతానికి చేరువ చేయాలనే లక్ష్యంతో పాఠశాల విద్యాశాఖ సమగ్ర కార్యాచరణకు శ్రీకారం చుట్టింది. ప్రధాన పరీక్షలు, అడ్వాన్స్‌డ్ సప్లిమెంటరీ పరీక్షల అనంతరం కూడా అనుత్తీర్ణులుగా మిగిలిన విద్యార్థులకు తెలంగాణ సార్వత్రిక విద్యాపీఠం (టాస్‌) ద్వారా మరో అవకాశాన్ని కల్పించేందుకు ప్రభుత్వం సన్నాహాలు చేస్తోంది. ఈ విధానం అమల్లోకి వస్తే పదో తరగతిలో అపజయం పాలయ్యే విద్యార్థుల సంఖ్య గణనీయంగా తగ్గి, ఉన్నత విద్యలో ప్రవేశాలకు విస్తృత అవకాశాలు లభించనున్నాయి.
ఈ విద్యా సంవత్సరంలో మార్చిలో నిర్వహించిన ఎస్సెస్సీ పరీక్షలకు 5,16,815 మంది రెగ్యులర్ విద్యార్థులు హాజరుకాగా, వారిలో 4,91,774 మంది ఉత్తీర్ణులై 95.15 శాతం ఉత్తీర్ణత నమోదు చేశారు. గత ఏడాది నమోదైన 92.78 శాతంతో పోలిస్తే ఈసారి గణనీయమైన పురోగతి సాధించడం విశేషం. అనంతరం నిర్వహించిన అడ్వాన్స్‌డ్ సప్లిమెంటరీ పరీక్షలకు 24,028 మంది హాజరుకాగా, 20,423 మంది విజయాన్ని అందుకున్నారు. దీంతో ప్రధాన పరీక్షలు, సప్లిమెంటరీ కలిపి మొత్తం 5,12,197 మంది ఉత్తీర్ణులై రాష్ట్ర ఉత్తీర్ణత 99.10 శాతానికి చేరుకుంది.
ప్రస్తుతం 4,618 మంది విద్యార్థులు మాత్రమే అనుత్తీర్ణులుగా ఉండగా, మరో 1,013 మంది పరీక్షలకు హాజరు కాలేదు. వీరందరికీ టాస్‌ విధానంలో ప్రత్యేక పరీక్షలు నిర్వహించాలని పాఠశాల విద్యాశాఖ ప్రభుత్వానికి ప్రతిపాదించింది. ఈ విధానంలో రెండు సబ్జెక్టులకు మినహాయింపు ఇచ్చి, మిగిలిన అంశాల్లో మాత్రమే పరీక్షలు నిర్వహించే అవకాశాన్ని పరిశీలిస్తోంది.
ఈ ప్రతిపాదన అమలైతే విద్యార్థులు ఇదే విద్యా సంవత్సరంలో ఇంటర్మీడియట్‌తో పాటు తత్సమాన కోర్సుల్లో ప్రవేశాలు పొందేందుకు అవకాశం లభిస్తుంది. విద్యార్థుల విద్యా ప్రస్థానానికి అంతరాయం కలగకుండా, డ్రాప్‌అవుట్లను తగ్గిస్తూ ప్రతి విద్యార్థిని ఉన్నత విద్య వైపు నడిపించాలనే లక్ష్యంతో విద్యాశాఖ ఈ వినూత్న చర్యలను చేపడుతోంది. దీంతో రాష్ట్రంలో పదో తరగతి ఉత్తీర్ణత శాతం శతశాతానికి చేరువ కావడంతో పాటు విద్యా ప్రమాణాల అభివృద్ధికి కూడా ఈ నిర్ణయం దోహదపడనుంది.