మీర్‌పేట్‌లో మహిళ దారుణ హత్య

మీర్‌పేట్:
షేర్ మార్కెట్‌లో భారీ నష్టాలు.. ఆర్థిక ఇబ్బందులు.. బంగారం దోచుకోవాలనే దురాశ.. వెరసి ఓ మహిళ ప్రాణాలను బలిగొన్నాయి. రంగారెడ్డి జిల్లా మీర్‌పేట్ పరిధిలోని జిల్లెలగూడ దత్తునగర్‌లో మహిళ దారుణ హత్యకు గురైన ఘటన తీవ్ర కలకలం రేపింది. శ్రీలక్ష్మి రెసిడెన్సీలో నివాసం ఉంటున్న కేంద్ర ప్రభుత్వ ఉద్యోగి అరుణ్ కుమార్ భార్య అనిత (35)ను అదే అపార్ట్‌మెంట్‌లో నివసించే గడ్డ రాజ్‌కుమార్ (41) హత్య చేసినట్లు పోలీసులు గుర్తించారు.

పోలీసుల దర్యాప్తు ప్రకారం.. అనితను లక్ష్యంగా చేసుకున్న నిందితుడు ఆమె నోట్లో గుడ్డలు కుక్కి, కాళ్లు కట్టేసి కత్తితో పలుమార్లు పొడిచి దారుణంగా హతమార్చినట్లు వెల్లడైంది. అనంతరం ఆమె వద్ద ఉన్న బంగారాన్ని దొంగిలించినట్లు పోలీసులు గుర్తించారు. షేర్ మార్కెట్‌లో పెట్టుబడులు పెట్టిన రాజ్‌కుమార్‌కు సుమారు రూ.4 కోట్ల మేర నష్టం వచ్చినట్లు ప్రాథమిక విచారణలో తేలింది. ఈ ఆర్థిక నష్టాల నుంచి బయటపడేందుకు బంగారం దోపిడీకి పాల్పడాలని నిర్ణయించుకున్నట్లు పోలీసులు వెల్లడించారు.

ఈ ఘటనపై సమాచారం అందుకున్న పోలీసులు వెంటనే దర్యాప్తు చేపట్టి నిందితుడు గడ్డ రాజ్‌కుమార్‌ను అరెస్ట్ చేశారు. అతడి నుంచి 9 తులాల బంగారాన్ని స్వాధీనం చేసుకున్నారు. హత్యకు సంబంధించిన పూర్తి వివరాలు, నిందితుడి ప్రణాళిక, దోచుకున్న ఆభరణాల వ్యవహారంపై పోలీసులు మరింత విచారణ కొనసాగిస్తున్నారు.

ఒకే అపార్ట్‌మెంట్‌లో నివసించే వ్యక్తి ఇంతటి ఘాతుకానికి పాల్పడటంతో స్థానికులు తీవ్ర భయాందోళనకు గురయ్యారు. ఆర్థిక నష్టాలు, వ్యక్తిగత స్వార్థం పేరుతో ప్రాణాలు తీసే స్థాయికి దిగజారడం సమాజంలో ఆందోళన కలిగిస్తోంది. అనిత కుటుంబాన్ని విషాదంలో ముంచిన ఈ ఘటన స్థానికంగా తీవ్ర విషాదాన్ని నింపింది.