విద్యాశాఖలో ప్రతిష్ఠాత్మక డిప్యుటేషన్ నియామకాలకు శ్రీకారం

by shrikanth nallolla · Published June 29, 2026 · Updated June 29, 2026

రాష్ట్ర విద్యా వ్యవస్థలో నాణ్యమైన విద్యా పరిపాలనను మరింత పటిష్ఠం చేసే దిశగా పాఠశాల విద్యాశాఖ కీలక నిర్ణయం తీసుకుంది. డైట్, సీటీఈ, ఐఏఎస్‌ఈ, ఎస్‌సీఈఆర్టీ సంస్థల్లో ఖాళీగా ఉన్న వివిధ బోధన, విద్యా పరిపాలనా పోస్టులను డిప్యుటేషన్ ప్రాతిపదికన భర్తీ చేయడానికి విద్యాశాఖ అధికారిక నోటిఫికేషన్‌ను విడుదల చేసింది. ఈ నియామక ప్రక్రియ పూర్తిగా డిప్యుటేషన్ ఆన్ ఫారిన్ సర్వీస్ టర్మ్స్ అండ్ కండీషన్స్ (ఎఫ్‌ఎస్‌టీసీ) నిబంధనల మేరకు పారదర్శకంగా నిర్వహించనున్నట్లు విద్యాశాఖ స్పష్టం చేసింది.
ఈ నియామకాలకు ప్రభుత్వ పాఠశాలల్లో విధులు నిర్వహిస్తున్న ప్రధానోపాధ్యాయులు, స్కూల్ అసిస్టెంట్‌లు మాత్రమే అర్హులుగా ప్రకటించారు. అభ్యర్థుల విద్యా ప్రావీణ్యం, బోధనా సామర్థ్యం, పరిపాలనా నైపుణ్యాన్ని సమగ్రంగా అంచనా వేసే విధంగా ఎంపిక ప్రక్రియను రూపొందించారు. ఆన్‌లైన్ ద్వారా దరఖాస్తుల స్వీకరణ జులై 4న ప్రారంభమై జులై 14 వరకు కొనసాగనుంది. అనంతరం జులై 25 నుంచి 31 వరకు కంప్యూటర్ ఆధారిత రాత పరీక్ష నిర్వహించనున్నారు.
రాత పరీక్షలో ప్రతిభ కనబరిచిన అభ్యర్థులకు ఆగస్టు 6 నుంచి 8 వరకు ఇంటర్వ్యూలు నిర్వహించి తుది ఎంపిక చేపట్టనున్నారు. ఎంపికైన అభ్యర్థులకు ఆగస్టు 10న డిప్యుటేషన్ ఉత్తర్వులు జారీ చేయనున్నట్లు పాఠశాల విద్యా కమిషనర్, డైరెక్టర్ నవీన్ నికోలస్ తెలిపారు.
విద్యా ప్రమాణాల ఉన్నతీకరణ, ఉపాధ్యాయ శిక్షణా వ్యవస్థలో సామర్థ్యాభివృద్ధి, విద్యా పరిశోధనలకు ప్రోత్సాహం, శిక్షణా సంస్థల కార్యనిర్వహణలో సమర్థత పెంపు లక్ష్యంగా ఈ నియామక ప్రక్రియ చేపట్టినట్లు అధికారులు పేర్కొన్నారు. అర్హత కలిగిన ఉపాధ్యాయులు నిర్ణీత గడువులోగా దరఖాస్తు చేసుకుని ఈ అవకాశాన్ని సద్వినియోగం చేసుకోవాలని విద్యాశాఖ సూచించింది.