అక్రమ వలసలకు నో ఛాన్స్‌..
- మళ్లీ పెరుగుతున్న పసిడి ధరలు.. స్వల్పంగా తగ్గిన వెండి! - November 10, 2026
- అక్షర్‌ పటేల్‌కు చెన్నై గాలం.. - November 10, 2026
- మమతా బెనర్జీకి ఢిల్లీ పోలీసుల నోటీసులు.. - November 10, 2026
జ్ఞాన తెలంగాణ, అంతర్జాతీయం: అమెరికాలో అక్రమ వలసలపై అధ్యక్షుడు డొనాల్డ్‌ ట్రంప్‌ మరోసారి తన కఠిన వైఖరిని స్పష్టం చేశారు. వలసల సమస్యకు పరిష్కారం కనుగొనేందుకు డెమోక్రాట్లతో ఒప్పందం చేసుకోవడానికి సిద్ధంగా ఉన్నానని ప్రకటించినప్పటికీ, అక్రమంగా దేశంలోకి ప్రవేశించిన వారికి ఎలాంటి క్షమాభిక్ష ఉండబోదని తేల్చిచెప్పారు. అమెరికాలో నివసించాలన్నా, ప్రవేశించాలన్నా చట్టబద్ధమైన నిబంధనలు తప్పనిసరిగా పాటించాలని స్పష్టం చేశారు. వైట్‌హౌస్‌లో సోమవారం నిర్వహించిన మీడియా సమావేశంలో ట్రంప్‌ ఈ వ్యాఖ్యలు చేశారు. వలసల అంశంపై డెమోక్రాట్లతో చర్చలకు సిద్ధమేనని, అయితే అక్రమ వలసదారులకు మినహాయింపులు ఇచ్చే ప్రసక్తే లేదని పేర్కొన్నారు. ఒప్పందానికి సంబంధించిన నిబంధనలు, గడువు, అర్హతలపై మాత్రం స్పష్టత ఇవ్వలేదు. తన సలహాదారు స్టీఫెన్‌ మిల్లర్‌ను ట్రంప్‌ ప్రశంసించారు. కఠినంగా వ్యవహరిస్తూనే న్యాయబద్ధమైన నిర్ణయాలు తీసుకునే సామర్థ్యం ఆయనకు ఉందని కొనియాడారు. డెమోక్రాట్లతో చర్చలు జరపడంలోనూ ఆయన కీలక పాత్ర పోషించగలరని అభిప్రాయపడ్డారు. మరోవైపు ఇంధన, మౌలిక వసతుల ప్రాజెక్టులకు వేగంగా అనుమతులు మంజూరు చేసేలా రూపొందించిన బిల్లుకు పూర్తి మద్దతు ప్రకటించారు. అయితే పవన విద్యుత్‌ టర్బైన్ల ఏర్పాటుకు మాత్రం అనుమతి ఇచ్చే విషయంలో తన వ్యతిరేకతను వెల్లడించారు. బిల్లుపై చర్చలు ఇంకా కొనసాగుతున్నాయని తెలిపారు. అంతర్జాతీయ పరిణామాలపైనా ట్రంప్‌ సంచలన వ్యాఖ్యలు చేశారు. వెనెజువెలాలో చేపట్టిన సైనిక ఆపరేషన్‌ కేవలం 48 నిమిషాల్లో ముగిసిందని, ఎలాంటి ప్రాణనష్టం జరగలేదని పేర్కొన్నారు. ఇరాన్‌తో జరిగిన యుద్ధంలో అమెరికా విజయం సాధించిందని, ఆ దేశ నౌకాదళం, వైమానిక దళం తీవ్రంగా దెబ్బతిన్నాయని వ్యాఖ్యానించారు. ఇరాన్‌ ఒప్పందానికి సిద్ధంగా ఉందని కూడా వెల్లడించారు. అయితే ఈ వాదనలకు సంబంధించి స్వతంత్ర ఆధారాలను ఆయన వెల్లడించలేదు. మరోవైపు క్యూబా పరిస్థితులు అత్యంత దారుణంగా ఉన్నాయని పేర్కొన్న ట్రంప్‌.. అక్కడి ప్రజలకు అమెరికా మానవతా సాయం అందిస్తోందని తెలిపారు. వలసల విధానంపై కఠిన వైఖరిని కొనసాగిస్తూనే, కీలక అంతర్జాతీయ అంశాల్లో తన నిర్ణయాధికారాన్ని చాటుకునే ప్రయత్నం ట్రంప్‌ వ్యాఖ్యల్లో కనిపిస్తోంది.
