బీజాపూర్‌లో భారీ మావోయిస్టు డంప్‌లు స్వాధీనం

ఛత్తీస్‌గఢ్‌: ఛత్తీస్‌గఢ్‌ రాష్ట్రంలోని బీజాపూర్‌ జిల్లాలో భద్రతా బలగాలు భారీ మావోయిస్టు డంప్‌లను స్వాధీనం చేసుకున్నాయి. రెండు వేర్వేరు ప్రాంతాల్లో గతంలో మావోయిస్టులు దాచిపెట్టిన పేలుడు సామగ్రిని గుర్తించి స్వాధీనం చేసుకోవడం భద్రతా వర్గాల్లో ప్రాధాన్యత సంతరించుకుంది. గంగలూరు పోలీస్‌స్టేషన్‌ పరిధిలోని కుప్పగూడా–లెక్కంపర అటవీ ప్రాంతంలో ఈ డంప్‌లను గుర్తించారు. అటవీ ప్రాంతాల్లో మావోయిస్టులు రహస్యంగా నిల్వ ఉంచిన పేలుడు పదార్థాలు, ఇతర సామగ్రిని వెలికితీసేందుకు భద్రతా బలగాలు ప్రత్యేకంగా గాలింపు చర్యలు చేపట్టాయి.

ఈ ఆపరేషన్‌లో సీఆర్పీఎఫ్‌ 99వ బెటాలియన్‌, కోబ్రా 204 బలగాలు, డాగ్‌ స్క్వాడ్‌ సంయుక్తంగా పాల్గొన్నాయి. అటవీ ప్రాంతంలో అనుమానాస్పద ప్రదేశాలను క్షుణ్ణంగా తనిఖీ చేస్తూ డంప్‌లను గుర్తించారు. రెండు డంప్‌లలో భారీ మొత్తంలో పేలుడు సామగ్రి ఉన్నట్లు అధికారులు గుర్తించారు. స్వాధీనం చేసుకున్న వాటిలో 33 బ్యారెల్‌ గ్రెనేడ్‌ లాంచర్‌ సెల్స్‌, సుమారు 1,400 మీటర్ల కార్డెక్స్‌ వైర్‌ ఉన్నాయి. వీటితో పాటు ఇతర పేలుడు సామగ్రిని కూడా భద్రతా బలగాలు స్వాధీనం చేసుకున్నాయి.

గతంలో మావోయిస్టులు భద్రతా బలగాల కదలికలను లక్ష్యంగా చేసుకుని వినియోగించేందుకు అటవీ ప్రాంతాల్లో ఈ సామగ్రిని దాచినట్లు అధికారులు భావిస్తున్నారు. డంప్‌ల గుర్తింపుతో మావోయిస్టుల పేలుడు సామగ్రి నిల్వలపై భద్రతా బలగాలకు కీలక సమాచారం లభించినట్లయింది. స్వాధీనం చేసుకున్న పేలుడు పదార్థాలను నిబంధనల ప్రకారం భద్రపరిచి, వాటి నిల్వ వెనుక ఉన్న పరిస్థితులపై అధికారులు దర్యాప్తు చేస్తున్నారు. అటవీ ప్రాంతాల్లో మరిన్ని రహస్య డంప్‌లు ఉన్నాయా అనే కోణంలో గాలింపు చర్యలు కొనసాగుతున్నాయి.