ఏకగ్రీవంగా ఎన్నుకుంటే రూ.1.50 కోట్ల విరాళం!

ఆంధ్రప్రదేశ్‌:
గ్రామాభివృద్ధికి భారీ విరాళాల ప్రకటనలతో ఆంధ్రప్రదేశ్‌లోని తూర్పుగోదావరి జిల్లా కడియం మండలం దుళ్ళ గ్రామ సర్పంచ్‌ ఎన్నిక ఆసక్తికరంగా మారింది. తనను సర్పంచ్‌ అభ్యర్థిగా ఏకగ్రీవంగా ఎన్నుకుంటే గ్రామ అభివృద్ధి కోసం రూ.1.50 కోట్లు విరాళంగా అందిస్తానని మాజీ సర్పంచ్‌ దూడల నాగేశ్వరరావు కుమార్తె, ఎంబీబీఎస్‌ విద్యార్థిని విశ్వశ్రీ ప్రియ ప్రకటించారు. ఎన్నికలకు ముందే ఆమె చేసిన ఈ ప్రకటన గ్రామంలో చర్చనీయాంశంగా మారింది.

ఇటీవల ఇదే గ్రామానికి చెందిన మాజీ ఉపసర్పంచ్‌ తోకల శ్రీనివాస్‌ కూడా తనను సర్పంచ్‌గా ఏకగ్రీవంగా ఎన్నుకుంటే గ్రామాభివృద్ధికి రూ.కోటి విరాళంగా ఇస్తానని ప్రకటించారు. తాజాగా విశ్వశ్రీ ప్రియ మరో రూ.50 లక్షలు అధికంగా, మొత్తం రూ.1.50 కోట్లు ఇస్తానని ప్రకటించడంతో గ్రామ రాజకీయాల్లో కొత్త చర్చ మొదలైంది. ఇద్దరు అభ్యర్థుల విరాళాల ప్రకటనలు స్థానికంగా ఆసక్తిని రేకెత్తిస్తున్నాయి.

తన తండ్రి దూడల నాగేశ్వరరావు, తల్లి రత్నం గతంలో గ్రామ సర్పంచ్‌లుగా పనిచేసి అభివృద్ధికి కృషి చేశారని విశ్వశ్రీ ప్రియ తెలిపారు. వారి సేవా స్ఫూర్తిని కొనసాగిస్తూ గ్రామ ప్రజలకు సేవ చేయాలనే ఉద్దేశంతో తాను ముందుకు వస్తున్నట్లు పేర్కొన్నారు. మరో ఏడాదిలో ఎంబీబీఎస్‌ విద్యను పూర్తి చేయనున్నానని, గ్రామ ప్రజలు తనకు అవకాశం కల్పిస్తే గ్రామాభివృద్ధికి అంకితభావంతో పనిచేస్తానని వెల్లడించారు.

ఒకవైపు రూ.కోటి, మరోవైపు రూ.1.50 కోట్ల విరాళాల ప్రకటనలతో దుళ్ళ గ్రామ సర్పంచ్‌ ఎన్నికపై అందరి దృష్టి పడింది. అయితే ఈ ప్రకటనలు గ్రామాభివృద్ధికి ఏ మేరకు దోహదపడతాయి? ఏకగ్రీవ ఎన్నిక సాధ్యమవుతుందా? అన్నది ఆసక్తికరంగా మారింది. మొత్తానికి ఎన్నికల ముందే భారీ విరాళాల హామీలతో దుళ్ళ గ్రామం రాష్ట్రవ్యాప్తంగా చర్చలో నిలిచింది.