“ఆ క్రమంలో “

పుడమిపైకి
ఎలా వచ్చామో
అలాగే పోతాం…

కానీ పోయే లోగా
కొద్దిమందితోనైనా
జ్ఞాపకాలను
పదిలపరచుకోవాలి….!!

జీవితంలో
కొన్ని పరిచయాలు
అవసరాల దారులు
కావచ్చు గాక….

“ఆ క్రమంలో “
విరుచుకుపడుతున్న
ప్రచండ శబ్ద భేరుండం
ముందు బెదురు పిట్టలా
ఓటమి పలకరించినా…

ఆ ఓటమిని
ఎలా తట్టుకోవాలో
నేర్చుకోవాలి….!!

జీవితంలో…..
కొన్ని పరిచయాలు
ఆనందాల తీరాలు
కావచ్చు గాక….

“ఆ క్రమంలో”
అంతులేని
కోరికల ఊబిలో
నిత్యం ఊగిసలాడక…

మనసును
మౌనం చేయడం
నేర్చుకోవాలి….!!

జీవితంలో….
కొన్ని పరిచయాలు
జ్ఞాపకాల మల్లెలు
కావచ్చు గాక ‌…

“ఆ క్రమంలో”
ఎవరికీ అంతు పట్టని
బ్రహ్మ పదార్థం మరణం
కల్లోల భరితమైన
కఠిన వాస్తవంగా
పలకరించేలోపు….

నాది అనే
అహంకారపు
పొరలను వీడి
అంతర్గతంగా
తనలో దాగున్న
మంచితనం
పంచుకుంటే
మనిషితనం పెరుగుతుందనే
జీవన సూత్రాన్ని
నేర్చుకోవాలి….!!

---

నలిగల రాధికా రత్న.