మేడిగడ్డ నుంచి కేటీఆర్‌ బస్సు యాత్ర!
- మేడిగడ్డ నుంచి కేటీఆర్‌ బస్సు యాత్ర! - November 2, 2026
- తెలంగాణలో ఖేలో ఇండియా క్రీడలకు భారీ ఏర్పాట్లు - November 2, 2026
- కరువు కాటుకు రైతులు విలవిల.. - November 2, 2026
జ్ఞాన తెలంగాణ,హైదరాబాద్ ప్రతినిధి: తెలంగాణ రాజకీయాల్లో మరోసారి బీఆర్ఎస్‌ కార్యాచరణ వేగం పుంజుకుంటోంది. రాష్ట్రంలో ప్రజా సమస్యలను ప్రస్తావిస్తూ రాజకీయంగా ప్రజల్లోకి వెళ్లేందుకు బీఆర్ఎస్‌ వర్కింగ్‌ ప్రెసిడెంట్‌, మాజీ మంత్రి కేటీఆర్‌ బస్సు యాత్రకు సిద్ధమవుతున్నారు. నవంబర్‌ 11 నుంచి 14వ తేదీల మధ్య రెండు రోజుల పాటు ఈ యాత్ర నిర్వహించనున్నట్లు బీఆర్ఎస్‌ ఎమ్మెల్యే, మాజీ మంత్రి గంగుల కమలాకర్‌ వెల్లడించారు. యాత్రకు సంబంధించిన ప్రణాళికలను పార్టీ నాయకత్వం సిద్ధం చేస్తోందని తెలిపారు. ఈ బస్సు యాత్ర ద్వారా సాగునీటి ప్రాజెక్టుల పరిస్థితి, రైతులు ఎదుర్కొంటున్న సమస్యలను ప్రజల దృష్టికి తీసుకురావాలని పార్టీ భావిస్తోంది.
కేటీఆర్‌ బస్సు యాత్ర మేడిగడ్డ నుంచి ప్రారంభం కానుంది. గోదావరి పరీవాహక ప్రాంతంలోని ప్రధాన సాగునీటి ప్రాజెక్టుల మీదుగా యాత్ర కొనసాగుతుందని గంగుల కమలాకర్‌ వివరించారు. ప్రాజెక్టుల ప్రస్తుత పరిస్థితిని క్షేత్రస్థాయిలో పరిశీలించడంతో పాటు నీటి నిర్వహణ, సాగునీటి సరఫరా, రైతులకు ఎదురవుతున్న ఇబ్బందులను అధ్యయనం చేయనున్నట్లు తెలిపారు. క్షేత్రస్థాయిలో సేకరించిన వివరాలు, వాస్తవ పరిస్థితులను ప్రజల ముందుంచడమే యాత్ర ప్రధాన ఉద్దేశమని పేర్కొన్నారు.
గోదావరి జలాల వినియోగం, సాగునీటి ప్రాజెక్టుల నిర్వహణ, రైతులకు నీటి అందుబాటు వంటి అంశాలు తెలంగాణ వ్యవసాయ రంగానికి కీలకంగా మారాయి. ఈ నేపథ్యంలో కేటీఆర్‌ యాత్రకు రాజకీయంగా ప్రాధాన్యత ఏర్పడుతోంది. ప్రాజెక్టుల పరిస్థితిపై ప్రజలకు వివరించడంతో పాటు రైతులతో నేరుగా మాట్లాడి వారి సమస్యలను తెలుసుకునే అవకాశం ఈ యాత్ర ద్వారా కలగనుంది. పార్టీ శ్రేణులు యాత్రను విజయవంతం చేసేందుకు అవసరమైన ఏర్పాట్లపై దృష్టి సారిస్తున్నాయి.
ఇదిలా ఉండగా, తెలంగాణ మలిదశ ఉద్యమంలో కీలక ఘట్టంగా నిలిచిన దీక్షా దివస్‌ను పురస్కరించుకుని నవంబర్‌ 29న భారీ బహిరంగ సభ నిర్వహించాలని బీఆర్ఎస్‌ నిర్ణయించింది. 2009లో తెలంగాణ ఉద్యమ సమయంలో పార్టీ అధినేత కేసీఆర్‌ను అరెస్టు చేసిన ప్రాంతాలైన అలుగునూరు లేదా నుస్తులాపూర్‌లో ఈ సభ నిర్వహించే అవకాశాలను పరిశీలిస్తున్నట్లు గంగుల కమలాకర్‌ తెలిపారు. సభకు సుమారు 50 వేల మందికి పైగా ప్రజలను సమీకరించాలని లక్ష్యంగా పెట్టుకున్నట్లు వెల్లడించారు.
బస్సు యాత్రతో పాటు దీక్షా దివస్‌ సభను కూడా ప్రతిష్ఠాత్మకంగా నిర్వహించాలని బీఆర్ఎస్‌ నాయకత్వం భావిస్తోంది. ఒకవైపు గోదావరి ప్రాజెక్టుల అంశాన్ని ప్రజల్లోకి తీసుకెళ్తూ, మరోవైపు తెలంగాణ ఉద్యమ చరిత్రను గుర్తుచేసే కార్యక్రమాలతో పార్టీ శ్రేణులను సమాయత్తం చేయాలని ప్రణాళికలు రూపొందిస్తోంది. కేటీఆర్‌ బస్సు యాత్ర, దీక్షా దివస్‌ సభ ద్వారా రాష్ట్ర రాజకీయాల్లో పార్టీ తన ఉనికిని మరింత బలంగా చాటుకునేందుకు సిద్ధమవుతోంది.
