రాజపుష్ప టిప్పర్ బీభత్సం.. సివిల్ ఇంజనీర్ దుర్మరణం
రాజపుష్ప టిప్పర్ బీభత్సం.. సివిల్ ఇంజనీర్ దుర్మరణం
- వెనుక నుంచి ఢీకొట్టిన టిప్పర్.. కిందపడగానే తలపైకి ఎక్కిన చక్రం
- పరారైన డ్రైవర్.. సీసీటీవీ ఆధారంగా వాహనం గుర్తింపు
- రోడ్డుపై బైఠాయించిన సహచరులు.. బాధ్యులపై కఠిన చర్యలు తీసుకోవాలని డిమాండ్
జ్ఞాన తెలంగాణ, రామచంద్రాపురం: సంగారెడ్డి జిల్లా రామచంద్రాపురం మండలం ఉస్మాన్నగర్లో మంగళవారం ఉదయం జరిగిన ఘోర రోడ్డు ప్రమాదం ఒక కుటుంబంలో తీవ్ర విషాదాన్ని నింపింది. విజన్ హర్షా కన్స్ట్రక్షన్ కంపెనీలో సివిల్ ఇంజనీర్గా పనిచేస్తున్న జనార్ధన్ (47) విధులకు వెళ్తున్న సమయంలో టిప్పర్ ఢీకొని దుర్మరణం పాలయ్యాడు.
ఉదయం సుమారు 8.30 గంటల సమయంలో బైక్పై విధులకు వెళ్తుండగా, రాజపుష్ప సంస్థకు చెందిన అశోక్ లేలాండ్ టిప్పర్ (TG 07V 3999) వెనుక నుంచి ఢీకొట్టినట్లు ప్రత్యక్ష సాక్షులు తెలిపారు. ఢీకొట్టిన ప్రభావానికి జనార్ధన్ రోడ్డుపై పడిపోగా, టిప్పర్ చక్రం ఆయన తలపైకి ఎక్కినట్లు స్థానికులు వెల్లడించారు. ఈ ఘటనలో తీవ్ర గాయాలపాలైన ఆయన అక్కడికక్కడే ప్రాణాలు కోల్పోయినట్లు సమాచారం.
ప్రమాదం జరిగిన వెంటనే టిప్పర్ డ్రైవర్ వాహనంతో పరారైనట్లు తెలిసింది. అయితే ఘటనాస్థలికి సమీపంలోని సీసీటీవీ ఫుటేజ్ను పరిశీలించిన విజన్ హర్షా కంపెనీ ఉద్యోగులు, సహచరులు టిప్పర్ను గుర్తించి రాజపుష్ప సంస్థ ప్రాంగణంలో పట్టుకున్నట్లు తెలిపారు.
సహచరుడి మృతితో ఆగ్రహించిన విజన్ హర్షా కంపెనీ ఉద్యోగులు, కార్మికులు రోడ్డుపై బైఠాయించి నిరసనకు దిగారు. నిర్లక్ష్యంగా వ్యవహరించిన డ్రైవర్పై, అలాగే ఘటనకు బాధ్యులైన వారిపై కఠిన చర్యలు తీసుకోవాలని డిమాండ్ చేస్తున్నారు. మృతుడి కుటుంబానికి తగిన నష్టపరిహారం అందించడంతో పాటు పూర్తి న్యాయం చేయాలని కోరారు.
ప్రమాదంలో మృతి చెందిన జనార్ధన్ మృతదేహాన్ని పోస్టుమార్టం నిమిత్తం పటాన్చెరు ప్రభుత్వ ఆసుపత్రికి తరలించారు. ఘటనపై పోలీసులు కేసు నమోదు చేసి దర్యాప్తు చేపట్టినట్లు తెలిసింది.
టిప్పర్ డ్రైవర్ల నిర్లక్ష్యానికి ఇంకెంత మంది బలి?
ఉస్మాన్నగర్లో జరిగిన ఈ ఘటన మరోసారి టిప్పర్ వాహనాల నిర్లక్ష్యపు డ్రైవింగ్పై తీవ్ర ఆందోళన వ్యక్తం అయ్యేలా చేసింది. నిర్మాణ ప్రాంతాలు, శివారు రహదారులపై అతివేగంగా దూసుకెళ్తున్న టిప్పర్ల కారణంగా సామాన్య ప్రజలు ప్రాణభయంతో ప్రయాణించాల్సిన పరిస్థితి నెలకొన్నదని స్థానికులు వాపోతున్నారు.
ట్రాఫిక్ నిబంధనలను ఉల్లంఘించే భారీ వాహనాలపై కఠిన నిఘా అవసరమని ప్రజలు సూచిస్తున్నారు. డ్రైవర్ల అర్హతలు, చెల్లుబాటు అయ్యే లైసెన్సులు, వాహనాల ఫిట్నెస్, ఓవర్లోడింగ్, అతివేగం వంటి అంశాలపై తరచూ తనిఖీలు నిర్వహించాల్సిన అవసరం ఉందని అభిప్రాయపడుతున్నారు.
టిప్పర్లు, భారీ లారీలపై పోలీసులు ప్రత్యేక డ్రైవ్లు నిర్వహిస్తున్నప్పటికీ, క్షేత్రస్థాయిలో మరింత కఠిన చర్యలు అవసరమని స్థానికులు పేర్కొంటున్నారు. ప్రమాదాలు జరిగిన తర్వాత స్పందించడం కంటే ముందస్తు చర్యల ద్వారానే ఇలాంటి విషాదాలను నివారించవచ్చని అంటున్నారు.
ఒక కుటుంబానికి పెద్ద దిక్కుగా ఉన్న జనార్ధన్ ప్రాణం తిరిగి రాదు. అయితే ప్రమాదానికి కారణమైన వారిపై చట్టపరమైన చర్యలు తీసుకోవడం, మృతుడి కుటుంబానికి న్యాయం చేయడం ద్వారా మాత్రమే ఆయనకు నిజమైన నివాళి అర్పించినట్లవుతుందని సహచరులు, స్థానికులు భావిస్తున్నారు.
