22ఏ సంకెళ్లలో సామాన్యుడి భూమి..

ధరణి పోర్టల్‌లోని లోపాలను సరిదిద్ది మరింత పారదర్శకమైన రెవెన్యూ వ్యవస్థను తీసుకువస్తామని చెప్పిన కాంగ్రెస్‌ ప్రభుత్వం.. భూభారతి అమలుతో సామాన్యుల భూహక్కులను మరింత సంక్లిష్టం చేసిందనే విమర్శలు వెల్లువెత్తుతున్నాయి. నిబంధనలను సరళీకరిస్తామని చెప్పి, ఆచరణలో కొత్త చిక్కులు సృష్టించారని ప్రజలు ఆగ్రహం వ్యక్తం చేస్తున్నారు. ముఖ్యంగా 22ఏ నిషేధిత జాబితాలో ప్రైవేట్‌ ఆస్తులు చేరడంతో యజమానులు తమ సొంత భూములపై హక్కులను వినియోగించుకోలేని దుస్థితి నెలకొంది.

హైదరాబాద్‌, రంగారెడ్డి, మేడ్చల్‌, సంగారెడ్డి జిల్లాల పరిధిలో విలువైన భూములు, ఇళ్లు, లేఅవుట్లు నిషేధిత జాబితాలో చేరుతున్నాయన్న ఆరోపణలు తీవ్ర కలకలం రేపుతున్నాయి. దశాబ్దాలుగా స్వాధీనంలో ఉన్న ఆస్తులు ఒక్కసారిగా నిషేధిత జాబితాలో కనిపించడంతో యజమానులు అధికారుల చుట్టూ తిరగాల్సిన పరిస్థితి ఏర్పడింది. రికార్డుల్లో మార్పులు జరిగినా తమకు సమాచారం లేకపోవడంతో అనేక కుటుంబాలు ఆందోళనకు గురవుతున్నాయి.

నిషేధిత జాబితాలో చేరిన ఆస్తిని విక్రయించడం మాత్రమే కాదు.. బ్యాంకు రుణం కోసం కుదువ పెట్టుకోవడం కూడా కష్టంగా మారుతోంది. పిల్లల చదువులు, వివాహాలు, వైద్య ఖర్చులు, వ్యాపార అవసరాల కోసం ఆస్తిని ఉపయోగించుకోవాలనుకునే కుటుంబాలకు 22ఏ జాబితా అడ్డంకిగా మారిందని బాధితులు వాపోతున్నారు. సొంత ఆస్తి ఉన్నా దానిపై ఆర్థిక హక్కులను వినియోగించుకోలేని పరిస్థితి సామాన్యుడిని తీవ్ర సంక్షోభంలోకి నెడుతున్నది.

ప్రైవేట్‌ భూములను నిషేధిత జాబితాలో చేర్చడంపై ప్రజల నుంచి ఫిర్యాదులు వెల్లువెత్తుతున్నా పరిష్కార ప్రక్రియ క్లిష్టంగా ఉందన్న విమర్శలు ఉన్నాయి. సమస్య పరిష్కారం కోసం ఒక అధికారి నుంచి మరో అధికారిని సంప్రదించాల్సి రావడం, రికార్డుల పరిశీలనలో జాప్యం, స్పష్టమైన సమాచారం అందకపోవడం బాధితుల ఇబ్బందులను మరింత పెంచుతున్నాయి. రెవెన్యూ వ్యవస్థను సులభతరం చేస్తామని చెప్పిన ప్రభుత్వం.. ప్రజలను మళ్లీ కార్యాలయాల చుట్టూ తిప్పుతున్నదనే ఆరోపణలు వినిపిస్తున్నాయి.

ప్రైవేట్‌ ఆస్తులు పొరపాటున నిషేధిత జాబితాలో చేరాయని ప్రభుత్వం వివరణ ఇచ్చినప్పటికీ.. ఇంత భారీ స్థాయిలో సమస్యలు ఎలా తలెత్తాయన్న ప్రశ్నలు ప్రజల నుంచి వస్తున్నాయి. హైదరాబాద్‌ నగరంతోపాటు చుట్టుపక్కల జిల్లాల్లో వేలాది ఫిర్యాదులు పెండింగ్‌లో ఉన్నాయన్న ఆరోపణల నేపథ్యంలో ప్రభుత్వం స్పష్టమైన జవాబుదారీతనాన్ని చూపాల్సిన అవసరం ఉంది. భూహక్కులు ప్రతి పౌరుడి ప్రాథమిక ఆస్తి హక్కుతో ముడిపడి ఉన్నందున.. తప్పిదాలకు బాధ్యులను గుర్తించి, నిషేధిత జాబితాలో అన్యాయంగా చేరిన ఆస్తులను తక్షణమే తొలగించాలని బాధితులు డిమాండ్‌ చేస్తున్నారు. ప్రజల భూములకు రక్షణ కల్పించాల్సిన వ్యవస్థే సమస్యకు కారణమైతే.. సామాన్యుడి న్యాయం కోసం తలుపు తట్టాల్సింది ఎవరన్న ప్రశ్న ఇప్పుడు తీవ్రంగా వినిపిస్తోంది.