డీప్‌ఫేక్‌తో రూ.5 కోట్ల దందా!

జ్ఞాన తెలంగాణ, హైదరాబాద్‌: సాంకేతిక పరిజ్ఞానాన్ని సృజనాత్మకతకు, అభివృద్ధికి వినియోగించాల్సిన కొందరు దుండగులు అదే సాంకేతికతను నేరాలకు అస్త్రంగా మలుచుకుంటున్నారు. డీప్‌ఫేక్‌ వీడియోలు, మార్ఫింగ్‌ ఫొటోలతో వ్యక్తుల ప్రతిష్ఠను బజారుకీడ్చి, కోట్ల రూపాయలు దండుకోవాలనే దురాశతో బ్లాక్‌మెయిల్‌ దందాకు తెరలేపారు. తాజాగా ఎంఐఎం బహిష్కృత ఎమ్మెల్సీ మీర్జా రహ్మత్‌ బేగ్‌ను లక్ష్యంగా చేసుకున్న 14 మంది సభ్యుల ముఠా వ్యవహారం పోలీసుల దర్యాప్తులో వెలుగులోకి వచ్చింది. నకిలీ వీడియోలు సృష్టించి వాటిని ఎమ్మెల్సీకి పంపిస్తూ రూ.5 కోట్లు ఇవ్వాలని, లేదంటే వాటిని బహిరంగంగా విడుదల చేస్తామని బెదిరింపులకు పాల్పడినట్లు ఆరోపణలు వెల్లువెత్తాయి.

త్వరగా డబ్బులు సంపాదించాలనే దురాశతో నిందితులు పక్కా ప్రణాళికతో ఈ వ్యవహారానికి పాల్పడినట్లు తెలుస్తోంది. ముందుగా ఎమ్మెల్సీకి సంబంధించిన మార్ఫింగ్‌ ఫొటోలు, డీప్‌ఫేక్‌ వీడియోలను సృష్టించి వాటిని ఆయనకు పంపించారు. అనంతరం వాటిని బయటపెడతామంటూ తీవ్రస్థాయిలో బెదిరింపులకు దిగారు. రూ.5 కోట్లు చెల్లించకపోతే పరువు ప్రతిష్ఠలకు భంగం కలిగించేలా వీడియోలను ప్రచారంలోకి తెస్తామని హెచ్చరించినట్లు సమాచారం. ఈ బెదిరింపులతో తీవ్ర ఆందోళనకు గురైన మీర్జా రహ్మత్‌ బేగ్‌ తొలుత రూ.5 లక్షలు చెల్లించినట్లు వెల్లడైంది.

అయినప్పటికీ నిందితుల దురాశకు అడ్డుకట్ట పడలేదు. మరో రూ.5 లక్షలు ఇవ్వాలంటూ ఒత్తిడి పెంచడంతో బాధిత ఎమ్మెల్సీ పోలీసులను ఆశ్రయించారు. దీంతో రంగంలోకి దిగిన పోలీసులు నిందితులను పట్టుకునేందుకు వ్యూహాత్మకంగా వ్యవహరించారు. ఈ నెల 5వ తేదీన తన కార్యాలయానికి వచ్చి నగదు తీసుకోవాలని ముఠా సభ్యులకు ఎమ్మెల్సీ ద్వారా సమాచారం పంపించారు. డబ్బులు తీసుకునేందుకు వచ్చిన నిందితులను పట్టుకునేందుకు పోలీసులు ముందస్తు నిఘా ఏర్పాటు చేశారు.

ఈ క్రమంలో ఐదుగురు నిందితులు ఎమ్మెల్సీ కార్యాలయానికి చేరుకుని నగదు తీసుకుంటుండగా పోలీసులు రెడ్‌హ్యాండెడ్‌గా పట్టుకున్నట్లు సమాచారం. మహ్మద్‌ మొహ్సిన్‌ ఖాన్‌ అనే మరో నిందితుడిని కూడా అదుపులోకి తీసుకున్నారు. మొత్తం వ్యవహారంలో 14 మంది సభ్యుల ప్రమేయం ఉన్నట్లు ప్రాథమికంగా గుర్తించిన పోలీసులు ముఠా కార్యకలాపాలపై దర్యాప్తు ముమ్మరం చేశారు. ప్రధాన నిందితుడైన ఏ-1తో పాటు మరికొందరు పరారీలో ఉండటంతో వారి కోసం గాలింపు చర్యలు చేపట్టారు.

డీప్‌ఫేక్‌ సాంకేతికతను ఉపయోగించి వ్యక్తుల ప్రతిష్ఠను దెబ్బతీస్తామని బెదిరించడం, ఆ భయాన్ని ఆసరాగా చేసుకుని డబ్బులు వసూలు చేయడం తీవ్రమైన సైబర్‌ నేరంగా మారుతోంది. డిజిటల్‌ ప్రపంచంలో కనిపించే ప్రతి వీడియో నిజమని నమ్మే పరిస్థితి లేదని ఈ ఘటన మరోసారి స్పష్టం చేస్తోంది. నకిలీ దృశ్యాలతో వ్యక్తులను బ్లాక్‌మెయిల్‌ చేసే ముఠాలపై కఠిన చర్యలు తీసుకోవడంతో పాటు, ఈ వ్యవహారం వెనుక ఉన్న మిగతా వ్యక్తులను గుర్తించి మొత్తం నెట్‌వర్క్‌ను ఛేదించాల్సిన అవసరం ఉంది.