హెచ్‌-1బీపై 1 లక్ష డాలర్ల ఫీజు కొనసాగింపు

జ్ఞాన తెలంగాణ ప్రతినిధి/వాషింగ్టన్‌, సెప్టెంబర్‌ 19: అమెరికా అధ్యక్షుడు డొనాల్డ్‌ ట్రంప్‌ హెచ్‌-1బీ వీసా విధానంలో మరో కీలక నిర్ణయం తీసుకున్నారు. 2025లో విధించిన 1 లక్ష డాలర్ల చెల్లింపు నిబంధనను కొన్ని హెచ్‌-1బీ దరఖాస్తులకు మరో 12 నెలల పాటు కొనసాగిస్తూ సెప్టెంబర్‌ 18న ప్రకటన జారీ చేశారు. కొత్త నిబంధన ప్రకారం అమెరికా వెలుపల ఉన్న హెచ్‌-1బీ ఉద్యోగుల ప్రవేశానికి సంబంధించిన కొన్ని పిటిషన్లతో 1 లక్ష డాలర్ల చెల్లింపు ఉండాలి. జాతీయ ప్రయోజనాల దృష్ట్యా హోంల్యాండ్‌ సెక్యూరిటీ కార్యదర్శి మినహాయింపు ఇవ్వగల నిబంధన కూడా ఉంది. ఈ పొడిగింపు 2026 సెప్టెంబర్‌ 21 నుంచి అమల్లోకి వచ్చి, మరో నిర్ణయం లేకపోతే 2027 సెప్టెంబర్‌ 21 వరకు కొనసాగుతుంది.

ఇదే సమయంలో హెచ్‌-1బీ స్పాన్సర్‌ చేసే సంస్థలు ఇటీవల అమెరికా ఉద్యోగులను తొలగించాయా? భవిష్యత్తులో ఇలాంటి ఉద్యోగ కోతలకు ప్రణాళికలు ఉన్నాయా? అనే అంశాలను వీసా దరఖాస్తుల పరిశీలనలో పరిగణనలోకి తీసుకోవాలని ట్రంప్‌ ప్రభుత్వం ఆదేశించింది. ముఖ్యంగా హెచ్‌-1బీ ఉద్యోగులు చేయబోయే పనులతో సమానమైన పనులు చేస్తున్న అమెరికా ఉద్యోగులపై లేఆఫ్స్‌ ప్రభావాన్ని పరిశీలించాలని ఉత్తర్వుల్లో పేర్కొన్నారు. అయితే ఉద్యోగులను తొలగించినంత మాత్రాన హెచ్‌-1బీ దరఖాస్తును ఆటోమేటిక్‌గా తిరస్కరించాలని ఉత్తర్వులు చెప్పడం లేదు.

ఇప్పటికే దాఖలైన లేబర్‌ కండిషన్‌ అప్లికేషన్లకు సంబంధించిన సమాచారాన్ని సమీక్షించే ప్రక్రియను 30 రోజుల్లో ప్రారంభించాలని అమెరికా కార్మిక శాఖను ఆదేశించారు. నిబంధనల ఉల్లంఘనలకు సంబంధించి స్పాన్సర్‌ సంస్థలపై తదుపరి చర్యలు అవసరమా అనే అంశాన్ని పరిశీలించనున్నారు. అలాగే విదేశాంగ, కార్మిక, హోంల్యాండ్‌ సెక్యూరిటీ శాఖలు వాణిజ్య, విద్య, చిన్న వ్యాపారాల పరిపాలన విభాగాలతో సమన్వయం చేసుకోవాలని ఆదేశాలు జారీ అయ్యాయి. వేతనాలు, ఉద్యోగాలు, పరిశ్రమలు, విద్యకు సంబంధించిన సమాచారాన్ని దరఖాస్తుల పరిశీలనలో ఉపయోగించనున్నారు.

వైట్‌హౌస్‌ వెల్లడించిన గణాంకాల ప్రకారం, 2025 నిబంధనలు అమల్లోకి వచ్చిన తర్వాత అతిపెద్ద ఐటీ ఔట్‌సోర్సింగ్‌ సంస్థల హెచ్‌-1బీ రిజిస్ట్రేషన్లు 92 శాతం తగ్గాయి. అలాగే కాన్సులర్‌ ప్రాసెసింగ్‌ అభ్యర్థనలు దాదాపు 97 శాతం తగ్గినట్లు ప్రభుత్వం తెలిపింది. ఇవి వైట్‌హౌస్‌ వెల్లడించిన గణాంకాలు, వాటి ఆధారంగా ప్రభుత్వం చేసిన విశ్లేషణగా పరిగణించాలి.