కాంగ్రెస్లో క్రమశిక్షణ కొరడా..
- షబ్బీర్ అలీకి ఏఐసీసీ షోకాజ్ నోటీసులు
- లీకైన ఆడియోతో ఢిల్లీ స్థాయికి చేరిన వివాదం
- టీపీసీసీ చీఫ్పై ఆరోపణలు పార్టీని ఇరకాటంలోకి నెట్టిన వ్యవహారం
- మహిళలపై అనుచిత వ్యాఖ్యల ఆరోపణలతో మరింత తీవ్రతరమైన సంక్షోభం
- పార్టీ ప్రతిష్ఠకు భంగం కలిగించారంటూ ఏఐసీసీ ఆగ్రహం
- కామారెడ్డి కాంగ్రెస్లో వర్గపోరు తారాస్థాయికి
- మాజీ మున్సిపల్ చైర్పర్సన్ ఇందుప్రియ పోలీసులకు ఫిర్యాదు
- సోషల్ మీడియా ట్రోలింగ్పై ఘాటైన ఆరోపణలు
- రాహుల్ గాంధీ దృష్టికి వ్యవహారం తీసుకెళ్తానంటూ హెచ్చరిక
జ్ఞానతెలంగాణ, స్టేట్ డెస్క్ :
కాంగ్రెస్ పార్టీలో అంతర్గత విభేదాలు మరోసారి బహిరంగ రచ్చగా మారాయి. మాజీ మంత్రి షబ్బీర్ అలీ చుట్టూ నెలకొన్న తాజా వివాదం ఇప్పుడు రాష్ట్ర రాజకీయాలనే కాకుండా పార్టీ అధిష్ఠానాన్ని సైతం కుదిపేస్తోంది. టీపీసీసీ అధ్యక్షుడు మహేష్ కుమార్ గౌడ్పై తీవ్ర ఆరోపణలు చేసినట్లు ప్రచారంలోకి వచ్చిన ఆడియో, మహిళలను కించపరిచేలా మాట్లాడినట్లు వచ్చిన విమర్శలు, అనంతరం చోటుచేసుకున్న రాజకీయ పరిణామాలు చివరకు ఏఐసీసీ క్రమశిక్షణ కమిటీ జోక్యానికి దారితీశాయి.
పార్టీ అంతర్గత వ్యవహారాలను బహిరంగ చర్చకు తీసుకురావడం, పార్టీ నాయకత్వంపై ఆరోపణలు చేయడం, సంస్థ ప్రతిష్ఠకు భంగం కలిగించే పరిస్థితులు సృష్టించడాన్ని తీవ్రంగా పరిగణించిన ఏఐసీసీ క్రమశిక్షణ కమిటీ షబ్బీర్ అలీకి షోకాజ్ నోటీసులు జారీ చేసింది. తన వ్యాఖ్యలపై పూర్తి వివరణ ఇవ్వాలని, పార్టీ క్రమశిక్షణకు విరుద్ధంగా వ్యవహరించిన అంశాలపై సమాధానం చెప్పాలని నోటీసులో స్పష్టం చేసినట్లు సమాచారం.
ఇక కామారెడ్డి కాంగ్రెస్లో ఇప్పటికే కొనసాగుతున్న వర్గపోరు ఈ ఘటనతో మరింత ఉద్ధృతమైంది. షబ్బీర్ అలీ వర్గం, గడ్డం చంద్రశేఖర్ రెడ్డి వర్గం మధ్య నెలకొన్న విభేదాలు ఇప్పుడు పరస్పర ఆరోపణలు, ఫిర్యాదుల దశకు చేరుకున్నాయి. ఈ నేపథ్యంలో మాజీ మున్సిపల్ చైర్పర్సన్ ఇందుప్రియ రంగంలోకి దిగడం వ్యవహారాన్ని మరింత వేడెక్కించింది.
తనపై, తన కుటుంబంపై సోషల్ మీడియాలో అసభ్యకర ప్రచారం జరుగుతోందని, రాజకీయంగా దెబ్బతీయడానికి కుట్రపూరిత ప్రచారం నడుస్తోందని ఆరోపిస్తూ ఆమె జిల్లా ఎస్పీకి అధికారిక ఫిర్యాదు చేశారు. తనను కించపరిచే పోస్టులు, ట్రోలింగ్ వెనుక ఉన్న వారిపై కఠిన చర్యలు తీసుకోవాలని డిమాండ్ చేశారు.
అంతేకాకుండా టీపీసీసీ చీఫ్ మహేష్ కుమార్ గౌడ్పై అసత్య ఆరోపణలు చేస్తే సహించబోమని, పార్టీ నాయకత్వాన్ని దెబ్బతీసే ప్రయత్నాలను తీవ్రంగా ప్రతిఘటిస్తామని ఇందుప్రియ హెచ్చరించారు. షబ్బీర్ అలీ కుటుంబ సభ్యుల నుంచే తనపై అసభ్యకర ప్రచారం జరుగుతోందని ఆరోపిస్తూ ఆమె తీవ్ర ఆగ్రహం వ్యక్తం చేశారు.
ఇప్పటికే అంతర్గత విభేదాలతో సతమతమవుతున్న కాంగ్రెస్ పార్టీకి ఈ వ్యవహారం కొత్త తలనొప్పిగా మారింది. రాష్ట్ర నాయకత్వంపై వచ్చిన ఆరోపణలు, వర్గపోరు, పరస్పర ఫిర్యాదులు, సోషల్ మీడియా యుద్ధాలు కలిసివచ్చి పార్టీ ప్రతిష్ఠను దెబ్బతీసే పరిస్థితి ఏర్పడిందని రాజకీయ వర్గాలు విశ్లేషిస్తున్నాయి.
మొత్తంగా చూస్తే కామారెడ్డి కాంగ్రెస్లో మొదలైన రాజకీయ ప్రకంపనలు ఇప్పుడు ఢిల్లీ స్థాయికి చేరుకున్నాయి. ఏఐసీసీ షోకాజ్ నోటీసులతో షబ్బీర్ అలీపై పార్టీ క్రమశిక్షణ కొరడా ఝళిపించిన నేపథ్యంలో ఈ వ్యవహారం ఎలాంటి మలుపు తిరుగుతుందన్నది రాజకీయ వర్గాల్లో ఆసక్తికర చర్చగా మారింది. కాంగ్రెస్లో వర్గపోరుకు ఇది ముగింపు పలుకుతుందా? లేక మరింత తీవ్రమవుతుందా? అన్నది రానున్న రోజుల్లో తేలనుంది
