గ్రామాల్లో మొదలైన ఎన్నికల సందడి — పార్టీల గెలుపు గుర్రాల శోధన
- రిజర్వేషన్లతో మరింత వేడి పుట్టిన అభ్యర్థుల పోటీ
- కుల–రాజకీయ సమీకరణాలపై పార్టీల గట్టి లెక్కలు
- ఆధికార–ప్రతిపక్షాల మధ్య ప్రచార యుద్ధం
- ‘6 గ్యారంటీలు’ అమలుపై బీఆర్ఎస్ ఘాటు విమర్శలు
- గ్రామాల దాకా వేడెక్కిన ఎన్నికల హోరు
జ్ఞానతెలంగాణ,స్టేట్ బ్యూరో :
తెలంగాణలో పంచాయతీ ఎన్నికల నోటిఫికేషన్ వెలువడడంతో గ్రామాలు రాజకీయ సంచలనాల కేంద్రాలుగా మారిపోయాయి. రిజర్వేషన్లు ఖరారవ్వడంతో, ఏ గ్రామంలో ఏ వర్గానికి అవకాశం లభించిందో స్పష్టమయ్యగానే రాజకీయ పార్టీలు సరైన అభ్యర్థి కోసం గాలింపును వేగవంతం చేశాయి. కుల సమీకరణాలు, గ్రామాల్లోని పాత రాజకీయ వైషమ్యాలు, కుటుంబ ఆధిపత్యం, వ్యక్తిగత ప్రభావం, ఇవన్నింటినీ చెక్కుచెదరకుండా లెక్కల్లో వేసుకుంటూ పార్టీలు “గెలుపు గుర్రం” ఎవరన్నది గుర్తించేందుకు అంతర్గత సర్వేలను ముమ్మరం చేశాయి. ప్రత్యేకంగా రిజర్వేషన్ వచ్చిన గ్రామాల్లో అభ్యర్థి ఎంపిక కోసం తీవ్ర పోటీ నెలకొంది. చిన్న పొరపాటు కూడా ఓటమి దారితీస్తుందని తెలిసిన పార్టీలన్నీ పూర్తి జాగ్రత్తగా తమ గణాంకాలను సరిచేస్తూ రాబోయే ఎన్నికలకు వ్యూహాలు అమలు చేస్తున్నాయి.
ఇతర వైపు అధికార కాంగ్రెస్ పార్టీకి దీటుగా ప్రతిపక్షాలు కూడా జోరు పెంచాయి. ముఖ్యంగా బీఆర్ఎస్, కాంగ్రెస్ ప్రభుత్వం ప్రకటించిన 6 గ్యారంటీలు అమల్లో విఫలమయ్యాయి అని ప్రజల్లో గట్టిగా చెబుతూ గ్రామాల్లో పాగా వేయాలని ప్రయత్నిస్తోంది. పెన్షన్ల పెంపు ఆలస్యం, ఆరోగ్య సేవల్లో లోపాలు, ఇళ్ల గ్యారంటీలో జాప్యం, యువగారంటీ అమల్లో స్పష్టతలేని పరిస్థితులు,ఇవన్నీ బీఆర్ఎస్ ప్రచార బండిలో ప్రధాన ఆయుధాలుగా మారాయి. “హామీలు ఇచ్చారు… అమలు మాత్రం లేదు” అనే నినాదంతో కాంగ్రెస్‌పై ప్రజల్లో అసంతృప్తి పెంచే యత్నం బీఆర్ఎస్ చేస్తున్నది. అధికార కాంగ్రెస్ మాత్రం గ్రామాల్లో అభివృద్ధి పనులు, నూతన సంక్షేమ పథకాలు, తమ ప్రభుత్వ నిర్ణయాలకు ప్రజల మద్దతు ఉన్నదని చెబుతూ నమ్మకాన్ని పునరుద్ధరించుకునే ప్రయత్నంలో ఉంది.
ఈ ఎన్నికలు కేవలం పంచాయతీ ఎన్నికలు మాత్రమే కాకుండా, గ్రామాల రాజకీయ దిశను నిర్ణయించే యుద్ధంగా మారాయి. అభ్యర్థి ఎంపికలు, రిజర్వేషన్ల ప్రభావం, కుల సమీకరణాలు, గ్యారంటీల అమలు–అవమానాలు ఈ ఎన్నికలను మరింత ఉత్కంఠభరితంగా మార్చాయి. ఏ పార్టీ గ్రామాల్లో పాగా వేసి ఆమోదం సంపాదిస్తుందో, ఏ నాయకుడు గెలుపు గుర్రంగా నిలుస్తాడో… సమీపంలోని రోజులు కీలకంగా మారబోతున్నాయి. గ్రామాల్లో మొదలైన ఈ రాజకీయ సందడి, రాబోయే ఎన్నికల హోరును మరింత వేడెక్కించింది.
