సంఘీగూడ గ్రామంలో అంబరానంటిన బతుకమ్మ సంబరాలు

గ్రామ పెద్దలు, యువకుల ఆధ్వర్యంలో సంఘీగూడలో కోలాహలంగా బతుకమ్మ ఉత్సవాలు

---

జ్ఞాన తెలంగాణ,నందిగామ ప్రతినిధి:

మేకగూడ గ్రామపంచాయతీ పరిధిలోని సంఘీగూడ గ్రామంలో బతుకమ్మ పండుగ వేడుకలు అత్యంత వైభవంగా, కన్నులపండువగా జరిగాయి. పండుగ సందర్భంగా ఊరంతా ఆధ్యాత్మిక, సాంస్కృతిక శోభతో నిండిపోయింది.
గ్రామ పెద్దలు మరియు యువకుల పర్యవేక్షణ, ఆధ్వర్యంలో ఈ బతుకమ్మ ఉత్సవాలను ఎంతో ప్రణాళికాబద్ధంగా నిర్వహించారు. పండుగ వేళ గ్రామానికి చెందిన మహిళలు, చిన్నారులు పెద్ద సంఖ్యలో పాల్గొని సంబరాల్లో సందడి చేశారు. సాంప్రదాయ వస్త్రాలతో ఆభరణాలతో ముస్తాబైన మహిళలు, బుడిబుడి అడుగుల చిన్నారులు వేడుకలకు ప్రత్యేక ఆకర్షణగా నిలిచారు. తంగేడు, గునుగు, చామంతి, గులాబీ పూలతో రూపొందించిన ఎత్తైన బతుకమ్మలను ఒకచోట చేర్చి పూజలు నిర్వహించారు.
సాయంత్రం వేళ మహిళలు, చిన్నారులు బతుకమ్మల చుట్టూ చేరి చప్పట్లు కొడుతూ, కోలాటాలు ఆడుతూ ఉత్సాహంగా గడిపారు. ” జానపద గేయాలు గ్రామంలో ప్రత్యేక కోలాహలాన్ని నింపాయి. గ్రామ పెద్దలు మరియు యువకులు వేడుకలకు ఎలాంటి అవాంఛనీయ సంఘటనలు జరగకుండా, అందరికీ సౌకర్యంగా ఉండేలా అన్ని ఏర్పాట్లు చూసుకున్నారు.
చివరగా, మహిళలందరూ కలిసి ఊరేగింపుగా వెళ్లి బతుకమ్మలను సమీప నీటి వనరులో సమర్పించి నిమజ్జనం చేశారు. అనంతరం ప్రసాదాలు మార్చుకుని, శుభాకాంక్షలు తెలుపుకోవడంతో సంఘీగూడలో బతుకమ్మ సంబరాలు ఆనందోత్సాహాల నడుమ ముగిశాయి