రామచంద్రపురంలో ఘనంగా రాజ్యాంగ దినోత్సవం

• అంబేద్కర్ విగ్రహానికి పూలమాలలు అర్పించిన బీఎస్పీ నేతలు
• రాజ్యాంగ విలువలపై ప్రజల్లో జాగృతి అవసరం అని పిలుపు

జ్ఞాన తెలంగాణ,రామచెంద్రాపురం :

పటాన్‌చెరు నియోజకవర్గంలోని రామచంద్రపురం పట్టణంలో రాజ్యాంగ దినోత్సవం సందర్భంగా అంబేద్కర్ విగ్రహానికి పూలమాలలు వేసి ఘనంగా నివాళులు అర్పించారు. బహుజన్ సమాజ్ పార్టీ రామచంద్రపురం సెక్టార్ ఇంచార్జ్ బాలరాజ్ ఆధ్వర్యంలో జరిగిన ఈ కార్యక్రమంలో రాజ్యాంగ మహత్తును ప్రజలకు చేర్చే దిశగా పిలుపునిచ్చారు. 26 నవంబర్ భారత రాజ్యాంగం ఆమోదించబడిన చారిత్రక రోజు కాబట్టి ప్రతి పౌరుడు దీన్ని పండగరోజుగా భావించాలని నాయకులు పేర్కొన్నారు. డాక్టర్ బి.ఆర్. అంబేద్కర్ గారు రిజర్వేషన్లు, హక్కులు, సమాన ఓటు హక్కు వంటి అమూల్యమైన వరాల ద్వారా ప్రజలను సాధికారత వైపు నడిపిన విషయాన్ని ఈ సందర్భంగా స్మరించారు.

ప్రజలు తమ ఓటు శక్తిని అర్థం చేసుకుని రాజకీయంగా చైతన్యవంతులవ్వాల్సిన అవసరాన్ని వక్తలు స్పష్టం చేశారు. ఓటును అమ్ముకోవడం బానిసత్వానికి దారితీస్తుందని, అంబేద్కర్ బాటలో నడిచి రాజకీయంలో ముందడుగు వేస్తేనే బహుజన రాజ్యం సాధ్యమవుతుందని అభిప్రాయపడ్డారు. ఈ లక్ష్యం బీఎస్పీ పార్టీ ద్వారానే సాకారం అవుతుందని వారు పేర్కొన్నారు. కార్యక్రమంలో BAMCEF దశరథ్, రాహుల్, బ్యాగరి రాజు, బల్ల నరసింహ, బందయ్య, శ్రీనివాస్ తదితరులు పాల్గొన్నారు.