సర్పంచుల గౌరవ వేతనాలపై వేడెక్కిన చర్చ

• 2021 తరువాత వేతనాల్లో పెంపు లేకపోవడంతో అసంతృప్తి
  
• డిసెంబర్ 11, 14, 17 తేదీల్లో మూడు విడతలుగా పోలింగ్

జ్ఞానతెలంగాణ,హైదరాబాద్ ప్రతినిధి.నవంబర్ 26:

తెలంగాణలో పంచాయతీ ఎన్నికల సందడి అధికారికంగా ప్రారంభమైంది. మూడు విడతల్లో స్థానిక సంస్థల ఎన్నికలు నిర్వహించనున్నట్లు రాష్ట్ర ఎన్నికల సంఘం ప్రకటించడంతో సర్పంచ్, వార్డు సభ్యుల స్థానాలకు ఆశావహులు సిద్ధమవుతుండగా, సర్పంచుల గౌరవ వేతనాల అంశం రాష్ట్రవ్యాప్తంగా చర్చనీయాంశంగా మారింది. ప్రస్తుతం సర్పంచులకు అందుతున్న రూ.6,500 గౌరవ వేతనం 2021లో కేసీఆర్ ప్రభుత్వం పెంచిన మొత్తమే. అంతకుముందు ఇది రూ.5,000 మాత్రమే. ఎంపీటీసీలకు కూడా ఇదే రకం గౌరవం అందుతున్నప్పటికీ, జడ్పీటీసీలు, ఎంపీపీల గౌరవ వేతనం రూ.13,000 గా కొనసాగుతోంది. జిల్లా పరిషత్ చైర్మన్‌లకు మాత్రం రూ.1 లక్ష వరకు గౌరవ వేతనం లభిస్తోంది. మరోవైపు, గ్రామ పంచాయతీ వార్డు సభ్యులు, ఉప సర్పంచ్‌లకు ఇప్పటికీ ఎలాంటి గౌరవ వేతనం నిర్దేశించకపోవడం పట్ల ఈ వర్గాలు అసంతృప్తి వ్యక్తం చేస్తూ డిమాండ్లు వినిపిస్తున్నాయి.

డిసెంబర్ 11, 14, 17 తేదీల్లో సర్పంచ్ ఎన్నికలు జరుగనున్న నేపథ్యంలో రాష్ట్రవ్యాప్తంగా ఎన్నికల కోడ్ అమల్లోకి వచ్చింది. మొత్తం 12,760 పంచాయతీలు, 1,13,534 వార్డుల ఎన్నికలకు ఏర్పాట్లు పూర్తికాగా, కోటి 66 లక్షల గ్రామీణ ఓటర్లు తమ ఓటు హక్కును వినియోగించుకోనున్నారు.