హైదరాబాద్లో కమర్షియల్ గ్యాస్ కొరత: వ్యాపార వర్గాల్లో ఆందోళన
హైదరాబాద్లో కమర్షియల్ గ్యాస్ కొరత: వ్యాపార వర్గాల్లో ఆందోళన
జ్ఞానతెలంగాణ,హైదరాబాద్:
హైదరాబాద్ నగరంలో కమర్షియల్ గ్యాస్ సిలిండర్ల కొరత తీవ్రంగా ఏర్పడడంతో హోటళ్లు, రెస్టారెంట్లు, టిఫిన్ సెంటర్లు మరియు చిన్న వ్యాపారులు తీవ్ర ఇబ్బందులు ఎదుర్కొంటున్నారు. ఇప్పటికే గత వారం రోజులుగా గ్యాస్ సరఫరా అంతరాయం ఏర్పడడంతో వినియోగదారులు తీవ్ర ఆందోళనకు గురవుతున్నారు.
వ్యాపారుల వివరాల ప్రకారం కమర్షియల్ గ్యాస్ సిలిండర్లు సమయానికి అందుబాటులో లేకపోవడంతో అనేక హోటళ్లు, ఆహార కేంద్రాలు తమ వ్యాపార కార్యకలాపాలను నిర్వహించడంలో ఇబ్బందులు పడుతున్నాయి. కొన్ని ప్రాంతాల్లో గ్యాస్ సిలిండర్ల కోసం ముందుగానే బుకింగ్ చేసుకున్నప్పటికీ సరఫరా ఆలస్యం అవుతోందని వ్యాపారులు ఆవేదన వ్యక్తం చేస్తున్నారు.
అంతర్జాతీయ పరిణామాల ప్రభావం కూడా ఈ కొరతకు కారణమవుతున్నట్లు తెలుస్తోంది. ముఖ్యంగా ఇరాన్ – ఇజ్రాయిల్ – అమెరికా మధ్య నెలకొన్న ఉద్రిక్త పరిస్థితులు మరియు యుద్ధ వాతావరణం కారణంగా గ్యాస్ సరఫరాలో అంతరాయం ఏర్పడినట్లు వ్యాపార వర్గాలు చెబుతున్నాయి. గ్యాస్ సరఫరా వ్యవస్థలో ఏర్పడిన సమస్యల వల్ల మార్కెట్లో కమర్షియల్ గ్యాస్ సిలిండర్ల కొరత స్పష్టంగా కనిపిస్తోంది.
ఈ పరిస్థితుల నేపథ్యంలో వ్యాపారులు ప్రభుత్వాన్ని మరియు గ్యాస్ సరఫరా సంస్థలను వెంటనే స్పందించాలని కోరుతున్నారు. కమర్షియల్ గ్యాస్ సరఫరాను త్వరితగతిన పునరుద్ధరించి వ్యాపారులకు ఎదురవుతున్న ఇబ్బందులను పరిష్కరించాలని డిమాండ్ చేస్తున్నారు. గ్యాస్ కొరత కొనసాగితే చిన్న వ్యాపారులు ఆర్థికంగా మరింత నష్టపోయే ప్రమాదం ఉందని వ్యాపార వర్గాలు హెచ్చరిస్తున్నాయి.
