బంగ్లా మాజీ ప్రధాని షేక్ హసీనాకు ఉరిశిక్ష
బంగ్లాదేశ్ రాజకీయాల్లో భారీ ప్రకంపనలు రేపిన తీర్పులో, ఇంటర్నేషనల్ క్రైమ్స్ ట్రైబ్యునల్ (ICT) మాజీ ప్రధాని షేక్ హసీనాకు ఉరిశిక్ష విధించింది. 2024లో ఢాకాలో జరిగిన విద్యార్థి–యువజన ఉద్యమాలపై హింసాత్మక దమన చర్యలకు హసీనా నేరుగా ఆదేశాలు ఇచ్చారనే ఆరోపణలను కోర్టు ‘మానవత్వంపై అత్యంత దారుణ నేరాలు’గా వర్ణించింది. నిరసనకారులపై కాల్పులు జరిపి అమాయకుల మరణాలకు కారణమయ్యారన్న అభియోగంలో కోర్టు ఆమెను దోషిగా తేల్చింది.
ప్రస్తుతం షేక్ హసీనా భారత్‌లో ఆశ్రయం తీసుకుని ఉండగా, ఆమె గైర్హాజరీలోనే విచారణ పూర్తయ్యింది. విచారణలో హసీనాకు రక్షణ అవకాశాలు తగ్గాయని, తగిన సహకారం అందలేదని ప్రతిపక్ష వర్గాలు ఆరోపిస్తున్నప్పటికీ, ICT కోర్టు మాత్రం “ఆమె చేసిన చర్యలు మానవత్వానికి మచ్చ” అని ఘాటుగా వ్యాఖ్యానించింది. “అమాయకులపై కాల్పులు జరపాలని స్పష్టమైన ఆదేశాలు ఇచ్చింది హసీనా” అని తీర్పులో పేర్కొంది.
ఈ తీర్పుతో బంగ్లాదేశ్ రాజకీయ వాతావరణం మరింత ఉద్రిక్తతకు గురవగా, దేశవ్యాప్తంగా భద్రతా దళాలు మోహరించబడ్డాయి. హసీనా అనుచరులు ఈ తీర్పును “రాజకీయ ప్రతీకారం”గా అభివర్ణిస్తుండగా, ఉద్యమకారులు మరియు మానవహక్కుల సంస్థలు “ఇది ప్రజల రక్తపాతం‌కు న్యాయం చేసిన రోజు”గా పేర్కొంటున్నాయి.
ఇప్పటికే తీవ్ర ఉద్వేగాలతో ఉన్న బంగ్లాదేశ్ రాజకీయ భవిష్యత్తు ఈ తీర్పుతో కొత్త దిశలోకి వెళ్లే సూచనలు స్పష్టంగా కనిపిస్తున్నాయి.
