శంకర్పల్లి మున్సిపాలిటీలో నామినేషన్ల సందడి
తొలి రోజే 8 నామినేషన్లు దాఖలు
మున్సిపల్ ఎన్నికలు–2026కు సంబంధించి శంకర్పల్లి మున్సిపాలిటీలో ఎన్నికల ప్రక్రియ అధికారికంగా ప్రారంభమైంది. ఎన్నికల నోటీసును శంకర్పల్లి మున్సిపల్ రిటర్నింగ్ అధికారులు (ROs) మరియు మున్సిపల్ కమిషనర్ విడుదల చేయడంతో, నామినేషన్ల స్వీకరణకు మార్గం సుగమమైంది. నోటీసు విడుదలైన తొలి రోజే మొత్తం 8 మంది అభ్యర్థులు నామినేషన్లు దాఖలు చేయడం గమనార్హం.
జనవరి 28, 2026న నామినేషన్లు దాఖలు చేసిన వారిలో కాంగ్రెస్, బీఆర్ఎస్, బీజేపీ పార్టీలకు చెందిన అభ్యర్థులు ఉన్నారు. కాంగ్రెస్ పార్టీ తరఫున ఎర్రా ఆనంద్ రావు (SC-G), జులకంటి శ్వేత (BC-W), కంకంటి జంగయ్య (BC-G), వకిటొల్ల గణేష్ (ST-G), సాథా ప్రవీణ్ కుమార్ (UR-G) నామినేషన్లు దాఖలు చేశారు. వీరంతా ‘హస్తం’ గుర్తును తమ ప్రాధాన్య చిహ్నంగా ఎంపిక చేసుకున్నారు.
బీఆర్ఎస్ పార్టీ నుంచి వన్నెపగ ఉషా కిరణ్ (SC-W), దండు సంతోష్ కుమార్ (UR-G) నామినేషన్లు సమర్పించగా, వీరు ‘కారు’ గుర్తును ఎంపిక చేసుకున్నారు. బీజేపీ పార్టీ నుంచి గుంతల లక్ష్మి (UR-W) నామినేషన్ దాఖలు చేసి, ‘కమలం’ గుర్తును ప్రాధాన్యంగా కోరారు.
నామినేషన్ ప్రక్రియ మొత్తం ఎన్నికల నియమావళి ప్రకారం ప్రశాంతంగా కొనసాగిందని ఎన్నికల అధికారులు తెలిపారు. అభ్యర్థుల వివరాలు, ప్రతిపాదకుల సమాచారం, ఎన్నికల రోల్ నంబర్లు, ఆస్తి–బాధ్యతల పత్రాలను పరిశీలించిన అనంతరం నామినేషన్లను స్వీకరించినట్టు అధికారులు వెల్లడించారు.
మున్సిపల్ ఎన్నికల నోటిఫికేషన్ విడుదలతో శంకర్పల్లి రాజకీయ వాతావరణం ఒక్కసారిగా వేడెక్కింది. ప్రధాన పార్టీలన్నీ గెలుపే లక్ష్యంగా వ్యూహాలు రచిస్తున్నాయి. నామినేషన్ల స్వీకరణ గడువు ముగిసేలోపు మరిన్ని దరఖాస్తులు వచ్చే అవకాశం ఉందని అధికారులు తెలిపారు
