అమల్లోకి కోడ్… ఉల్లంఘనకు శిక్ష తప్పదు!

➤ విద్వేష ప్రచారం నిషేధం
➤ ప్రార్థనా స్థలాల వాడకం లేదు
➤ ర్యాలీలకు అనుమతి తప్పనిసరి

జ్ఞానతెలంగాణ,స్టేట్ డెస్క్ :

తెలంగాణ పంచాయతీ ఎన్నికల షెడ్యూల్ ప్రకటించడంతో రాష్ట్రవ్యాప్తంగా మోడల్ కోడ్ ఆఫ్ కండక్ట్ అమల్లోకి వచ్చింది. ఎన్నికలు పూర్తయ్యే వరకు రాజకీయ పార్టీలు, అభ్యర్థులు, నేతలు, కార్యకర్తలు, అలాగే ప్రభుత్వం ఉద్యోగులు ఈ నిబంధనలను తప్పనిసరిగా పాటించాలి. కులం, మతం, వర్గాల పేరుతో ప్రజల్లో విద్వేషాలు రెచ్చగొట్టే ప్రకటనలు చేయడం, మతం లేదా కులం పేరుతో ఓట్లు అడగడం, అలాగే దేవాలయాలు, మసీదులు, చర్చిల వంటి ప్రార్థనా స్థలాలను ప్రచార వేదికలుగా ఉపయోగించడం పూర్తిగా నిషేధించబడింది. అభ్యర్థుల వ్యక్తిగత జీవితం మీద అసత్య ఆరోపణలు చేయడం, సోషల్ మీడియాలో దుష్ప్రచారం చేయడం కూడా శిక్షార్హమే. ఏ సమావేశం, ర్యాలీ, బైక్ ర్యాలీ, పాదయాత్ర నిర్వహించాలన్నా ముందస్తుగా అనుమతి తీసుకోవడం తప్పనిసరి. ధన ప్రలోభాలు, మద్యం పంపిణీ, బహుమతుల ద్వారా ఓటర్లను ప్రభావితం చేసే చర్యలను ఎన్నికల సంఘం అత్యంత తీవ్రంగా పరిగణిస్తుంది. ప్రభుత్వ వనరులను, వాహనాలను, కార్యాలయాలను లేదా అధికార హోదాను ప్రచారానికి ఉపయోగించడం నేరం. నిబంధనల ఉల్లంఘన ఎక్కడ కనిపించినా వెంటనే చర్యలు తీసుకుంటామని ఎన్నికల సంఘం హెచ్చరించింది. ప్రజాస్వామ్యం పవిత్రతను కాపాడేందుకు ప్రతి ఒక్కరూ అప్రమత్తంగా ఉండాలని సూచించింది.