మూసీ పునరుజ్జీవంతో హైదరాబాద్కు నూతన దిశ
- మార్చి 31లోగా అంచనాలు, టెండర్లు – పనుల ప్రారంభ లక్ష్యం
- శుద్ధమైన నీరు నిరంతరం ప్రవహించే సమగ్ర ప్రణాళిక
- కాలుష్యానికి శాశ్వత పరిష్కారం – డీపీఆర్ సిద్ధం
- గోదావరి జలాలు, గాంధీ సరోవర్ అభివృద్ధి ప్రణాళిక
- ADB రుణం, ఎలివేటెడ్ కారిడార్ – సమగ్ర నగరాభివృద్ధి
జ్ఞాన తెలంగాణ,హైదరాబాద్ ప్రత్యేక ప్రతినిధి :
హైదరాబాద్ మహానగర భవిష్యత్తును దృష్టిలో పెట్టుకుని మూసీ నది పునరుజ్జీవ ప్రాజెక్టును ప్రతిష్టాత్మకంగా చేపట్టాలని రాష్ట్ర ప్రభుత్వం కృతనిశ్చయంతో ముందుకు సాగుతోందని ముఖ్యమంత్రి శ్రీ ఎ. రేవంత్ రెడ్డి స్పష్టం చేశారు. మార్చి 31లోగా అంచనాలు సిద్ధం చేసి, టెండర్లు పిలిచి అభివృద్ధి పనులు ప్రారంభించాలన్న స్పష్టమైన లక్ష్యంతో ప్రభుత్వం పని చేస్తోందని ఆయన తెలిపారు. శాసనసభలో మూసీ పునరుజ్జీవం అంశంపై ప్రశ్నోత్తరాల సందర్భంగా ముఖ్యమంత్రి కలుగజేసుకుని, ఈ ప్రాజెక్టుకు సంబంధించిన విస్తృత లక్ష్యాలు, ఉద్దేశాలను సభ్యులకు వివరించారు.
మూసీ నది హైదరాబాద్ అభివృద్ధిలో కీలక పాత్ర పోషిస్తుందని, నగరాన్ని పర్యావరణ పరంగా సమతుల్యంగా తీర్చిదిద్దేందుకు ఇది మౌలిక అంశమని సీఎం పేర్కొన్నారు. ప్రపంచంలోని అభివృద్ధి చెందిన నగరాలను అధ్యయనం చేసిన అనంతరం, మూసీలో శుద్ధమైన నీరు నిరంతరం ప్రవహించేలా సమగ్ర ప్రణాళికలను రూపొందిస్తున్నామని తెలిపారు. నదీ పరివాహక ప్రాంతాల చుట్టూనే మానవ నాగరికత వికసించిందని, హైదరాబాద్లోనూ నిజాం హయాంలో మూసీ తీరం వెంబడి గొప్ప అభివృద్ధి జరిగిందని ఆయన గుర్తుచేశారు. 1908లో సంభవించిన ఘోర వరదల అనంతరం, నగరానికి శాశ్వత పరిష్కారంగా ఉస్మాన్ సాగర్, హిమాయత్ సాగర్ ప్రాజెక్టులను నిర్మించారని వివరించారు.
ప్రస్తుతం మూసీ నది కాలుష్యం తీవ్ర స్థాయికి చేరిందని, దీని వల్ల పరివాహక ప్రాంతాల్లో పర్యావరణం, ప్రజల ఆరోగ్యం దెబ్బతింటోందని సీఎం ఆందోళన వ్యక్తం చేశారు. పరిశ్రమల నుంచి విడుదలయ్యే మలినాలు, ఘన వ్యర్థాల సమస్యకు శాశ్వత పరిష్కారం చూపేలా చర్యలు తీసుకుంటున్నామని చెప్పారు. ఇందుకోసం అంతర్జాతీయ స్థాయి కన్సల్టెన్సీలను నియమించి, సమగ్ర డీపీఆర్ (వివరమైన ప్రాజెక్టు నివేదిక) సిద్ధం చేయాలని అధికారులను ఆదేశించినట్లు తెలిపారు.
బాపూ ఘాట్ వద్ద మూసా–ఈసా నదుల సంగమంలో ఉన్న గాంధీ సరోవర్ను ‘V’ ఆకారంలో అభివృద్ధి చేసి, అక్కడ ప్రపంచంలోనే ఎత్తైన మహాత్మా గాంధీ విగ్రహాన్ని నెలకొల్పే ప్రణాళిక ఉందని సీఎం వెల్లడించారు. అలాగే గోదావరి జలాలను తరలించి మూసీ సమస్యకు దీర్ఘకాలిక పరిష్కారం చూపాలన్నదే ప్రభుత్వ ఆలోచన అని చెప్పారు. మొత్తం 20 టీఎంసీల నీటిలో 15 టీఎంసీలను తాగునీటి అవసరాలకు, 5 టీఎంసీలను మూసీలో శుద్ధమైన నీరు నిరంతరం ప్రవహించేందుకు వినియోగించనున్నట్లు తెలిపారు.
ఈ ప్రతిష్టాత్మక ప్రాజెక్టుకు ఆసియా అభివృద్ధి బ్యాంకు (ADB) రూ.4 వేల కోట్ల రుణం ఇవ్వడానికి అంగీకరించిందని, కేంద్ర ప్రభుత్వం నుంచి కూడా అవసరమైన అనుమతులు లభించాయని ముఖ్యమంత్రి తెలిపారు. గండిపేట నుంచి గౌరెల్లి వరకు 55 కిలోమీటర్ల ఎలివేటెడ్ కారిడార్ నిర్మాణం కూడా ప్రణాళికలో భాగమని చెప్పారు.
మూసీ పరివాహక ప్రాంతాల్లో నివసించే పేదలకు మెరుగైన నివాసాలు, మౌలిక సదుపాయాలు కల్పిస్తామని, ఓల్డ్ సిటీతో పాటు నగరంలోని అన్ని ప్రాంతాలను సమానంగా అభివృద్ధి చేస్తామని సీఎం హామీ ఇచ్చారు. మంచిరేవుల సమీపంలోని పురాతన శివాలయాన్ని అభివృద్ధి చేయడంతో పాటు, మూసీ తీరం వెంబడి గురుద్వారా, మసీదు, చర్చి నిర్మాణాల ద్వారా మత సామరస్యాన్ని ప్రతిబింబించేలా చర్యలు చేపడతామని తెలిపారు.
డీపీఆర్ సిద్ధమైన తర్వాత శాసనసభ ముందు ఉంచి, ప్రజాప్రతినిధులు, నిపుణుల సలహాలు తీసుకుని ముందుకు వెళ్తామని పేర్కొన్నారు. హైదరాబాద్ను పర్యావరణ అనుకూలంగా, ప్రపంచస్థాయి నగరంగా తీర్చిదిద్దడమే ప్రభుత్వ ధ్యేయమని ముఖ్యమంత్రి శ్రీ ఎ. రేవంత్ రెడ్డి స్పష్టం చేశారు.
