సర్దార్ పటేల్‌కి ప్రధాని మోదీ ఘన నివాళులు
- ఐక్యతా ప్రతిజ్ఞ చేసిన ప్రధాని మోదీ
- గుజరాత్‌లోని స్టాట్యూ ఆఫ్ యూనిటీ వద్ద పటేల్‌కు ప్రధాని మోదీ నివాళి
- దేశ ఐక్యత, సమగ్రతను కాపాడతానని ఐక్యతా ప్రతిజ్ఞ చేసిన ప్రధాని
- పటేల్ సేవలను స్మరించుకుంటూ ‘ఎక్స్’లో పోస్ట్, వీడియో సందేశం విడుదల
జ్ఞానతెలంగాణ,సెంట్రల్ డెస్క్ అక్టోబర్ 31:
సర్దార్ వల్లభ్‌భాయ్ పటేల్ 150వ జయంతి సందర్భంగా దేశవ్యాప్తంగా జాతీయ ఐక్యతా దినోత్సవాన్ని (రాష్ట్రీయ ఏక్తా దివస్) ఘనంగా నిర్వహించారు. ఈ సందర్భంగా ప్రధాని నరేంద్ర మోదీ గుజరాత్‌లోని ఏక్తా నగర్‌లో నర్మదా నది ఒడ్డున ఉన్న ‘స్టాట్యూ ఆఫ్ యూనిటీ’ వద్ద సర్దార్ పటేల్ విగ్రహానికి పుష్పాంజలి ఘటించి నివాళులర్పించారు. అనంతరం నిర్వహించిన భారీ పరేడ్, సాంస్కృతిక ప్రదర్శనలు దేశ భిన్నత్వంలో ఏకత్వాన్ని ప్రతిబింబించాయి.
ఈ సందర్భంగా ప్రధాని మోదీ ‘ఏక్తా శపథ్’ (ఐక్యతా ప్రతిజ్ఞ) స్వీకరించారు. “దేశ ఐక్యత, సమగ్రతను కాపాడటానికి నా జీవితాన్ని అంకితం చేస్తాను. జాతీయ ఐక్యతా స్ఫూర్తితో ఈ ప్రమాణం స్వీకరిస్తున్నాను. దేశ అంతర్గత భద్రతను కాపాడేందుకు కట్టుబడి ఉంటాను” అని ఆయన ప్రతిజ్ఞలో పేర్కొన్నారు.ఉదయం 8 గంటల ప్రాంతంలో ప్రధాని మోదీ పటేల్ విగ్రహానికి పూలమాలలు అర్పించి, ‘రాష్ట్రీయ ఏక్తా దివస్ పరేడ్’ను వీక్షించారు. ఈ పరేడ్‌లో బీఎస్ఎఫ్, సీఆర్పీఎఫ్‌తో పాటు వివిధ రాష్ట్రాల పోలీస్ బలగాలు పాల్గొన్నాయి.తరువాత ‘ఎక్స్’ (ట్విట్టర్) వేదికగా మోదీ సర్దార్ పటేల్‌కి నివాళులర్పిస్తూ, “దేశాన్ని ఏకీకరణ చేయడంలో ఆయన కీలక శక్తిగా నిలిచారు. జాతీయ సమగ్రత, సుపరిపాలన, ప్రజాసేవ పట్ల ఆయనకున్న నిబద్ధత ఎన్నో తరాలకు స్ఫూర్తినిస్తుంది” అని పేర్కొన్నారు.విడుదల చేసిన వీడియో సందేశంలో ప్రధాని మోదీ, సర్దార్ పటేల్‌ను భారతదేశ ఏకీకరణ శిల్పిగా అభివర్ణించారు. భావజాల విభేదాలు ఉన్నవారితో కూడా కలిసి పనిచేసి ప్రజలను ఏకం చేయడంలో ఆయన సాటిలేని సామర్థ్యం కలిగిన నాయకుడని మోదీ అన్నారు. సంస్థానాలను దేశంలో విలీనం చేయడంలో, ప్రజల్లో భిన్నత్వంలో ఏకత్వం అనే మంత్రాన్ని మేల్కొల్పడంలో పటేల్ పాత్ర అపారమని గుర్తుచేశారు.ప్రతి సంవత్సరం అక్టోబర్ 31న సర్దార్ పటేల్ జయంతిని జాతీయ ఐక్యతా దినోత్సవంగా జరుపుకోవడం భారతదేశ ఐక్యత, సమగ్రత, భద్రతను బలోపేతం చేయడమే ప్రధాన లక్ష్యమని ప్రధాని స్పష్టం చేశారు.
