నేడు శ్రీ పాతాళ త్రికోణ సుందరి ఆలయంలో ఆరుద్ర మహాకాళి మహా హోమం

శంకర్‌పల్లి మండలం పర్వేద అనుబంధ గ్రామమైన కొత్తగూడ గ్రామ శివారులో ఉన్న ప్రసిద్ధ శ్రీ పాతాళ త్రికోణ మహా సుందరి ఆలయంలో పుష్య పౌర్ణమిని పురస్కరించుకుని ప్రత్యేక ఆధ్యాత్మిక కార్యక్రమాలు నిర్వహించనున్నట్లు ఆలయ ధర్మాధికారి మాధవరెడ్డి ఎర్రవల్లి తెలిపారు. భక్తుల ఆరాధ్య దైవమైన అమ్మవారి సన్నిధిలో నేడు ఉదయం 10.35 నిమిషాలకు ఆరుద్ర మహాకాళి మహా హోమం అత్యంత శాస్త్రోక్తంగా నిర్వహించనున్నట్లు వెల్లడించారు.
పుష్య పౌర్ణమి సందర్భంలో నిర్వహించే ఈ మహాహోమానికి విశేష ప్రాముఖ్యత ఉందని, అమ్మవారి కృపతో సకల దోషాలు నివృత్తి చెంది, కుటుంబాల్లో శాంతి, సౌభాగ్యం, ఆరోగ్యం కలుగుతాయని ఆలయ వర్గాలు పేర్కొన్నాయి. ఈ సందర్భంగా ప్రత్యేక పూజలు, అభిషేకాలు, హోమ కార్యక్రమాలు భక్తిశ్రద్ధలతో జరగనున్నాయి. వేద పండితుల మంత్రోచ్ఛారణల మధ్య మహాకాళి హోమం నిర్వహించబడుతుందని తెలిపారు.
ఈ పవిత్ర కార్యక్రమంలో భక్తులు అధిక సంఖ్యలో పాల్గొని అమ్మవారిని దర్శించుకుని తీర్థప్రసాదాలు స్వీకరించాలని ఆలయ ధర్మాధికారి కోరారు. హోమం అనంతరం అమ్మవారికి ప్రత్యేక నైవేద్యాలు సమర్పించనుండగా, భక్తుల కోసం అన్నదాన కార్యక్రమాన్ని కూడా ఏర్పాటు చేసినట్లు తెలిపారు. అన్నదానం మహాదానం అనే భావనతో ఈ కార్యక్రమాన్ని నిర్వహిస్తున్నామని, భక్తులందరూ ఈ సేవలో భాగస్వాములు కావాలని విజ్ఞప్తి చేశారు.
శ్రీ పాతాళ త్రికోణ మహా సుందరి ఆలయం ప్రాంతంలో పుష్య పౌర్ణమి రోజున ప్రత్యేక భక్తి వాతావరణం నెలకొంటుందని, పరిసర గ్రామాల నుంచి పెద్ద సంఖ్యలో భక్తులు తరలివచ్చే అవకాశం ఉందని ఆలయ నిర్వాహకులు తెలిపారు. భక్తుల సౌకర్యార్థం అవసరమైన ఏర్పాట్లు పూర్తిచేశామని, శాంతియుతంగా కార్యక్రమాలు జరగేలా చర్యలు తీసుకున్నామని పేర్కొన్నారు.