మున్సిపల్ ఎన్నికలకు రంగం సిద్ధం: రిజర్వేషన్లపై నేడు తుది స్పష్టత
- రిజర్వేషన్లపై ఉత్కంఠ
- తుది జాబితా విడుదలకు సిద్ధం
- రొటేషన్ విధానంలో కేటాయింపులు
- డ్రా పద్ధతిలో మహిళా రిజర్వేషన్లు
- ఎన్నికల షెడ్యూల్కు మార్గం
జ్ఞానతెలంగాణ,స్టేట్ డెస్క్ :
రాష్ట్రంలో జరగనున్న మున్సిపల్ ఎన్నికల నేపథ్యంలో నగరపాలక సంస్థలు, పురపాలక సంఘాల్లో రిజర్వేషన్లపై ఉత్కంఠ వాతావరణం నెలకొంది. రాష్ట్రవ్యాప్తంగా ఎన్నికలు జరగనున్న ఏడు నగరపాలక సంస్థలు, 116 పురపాలక సంఘాల్లో ఎస్సీ, ఎస్టీ, బీసీ, మహిళ, జనరల్ వర్గాలకు సంబంధించిన రిజర్వేషన్లపై నేడు స్పష్టత రానుంది. ఇప్పటికే ఈ అంశంపై పురపాలక శాఖ అధికారులు విస్తృత కసరత్తు పూర్తి చేసినట్లు సమాచారం. బుధవారం రాష్ట్ర పురపాలక శాఖ నగర, పురపాలికల్లో ఎస్సీ, ఎస్టీ, బీసీ, మహిళ, జనరల్ స్థానాలకు సంబంధించిన ప్రాథమిక జాబితాను విడుదల చేయగా, దాని ఆధారంగా మేయర్లు, చైర్పర్సన్లు, డివిజన్లు, వార్డుల వారీగా రిజర్వేషన్లను ఖరారు చేసే ప్రక్రియను అధికారులు చేపట్టారు. ఈ తుది నిర్ణయాలు నేడు వెలువడనున్న నేపథ్యంలో రాజకీయ వర్గాలు, ఆశావహుల్లో ఆసక్తి తారాస్థాయికి చేరింది. మున్సిపల్ ఎన్నికల్లో ఏ స్థానం ఏ వర్గానికి కేటాయిస్తారన్న అంశమే అనేక రాజకీయ భవిష్యత్తులను నిర్ణయించే స్థాయిలో ఉండటంతో ఉత్కంఠ మరింత పెరిగింది.
మేయర్లు, పురపాలక చైర్పర్సన్ స్థానాలకు సంబంధించిన రిజర్వేషన్లను హైదరాబాద్లో రాష్ట్ర స్థాయి అధికారులు ఖరారు చేయనుండగా, జిల్లాల్లోని పురపాలక సంఘాల్లో వార్డుల వారీగా రిజర్వేషన్లను జిల్లా స్థాయి అధికారులు నిర్ణయించనున్నారు. ఖరారైన రిజర్వేషన్లను జిల్లా గెజిట్లో తుది నోటిఫికేషన్గా విడుదల చేయనున్నారు. అనంతరం ఈ మొత్తం నివేదికలను రాష్ట్ర ఎన్నికల సంఘానికి సమర్పించనున్నారు. దీంతో ప్రభుత్వ పరంగా రిజర్వేషన్ ప్రక్రియ పూర్తవుతుంది. ఈ నివేదికలు ఎన్నికల సంఘానికి అందిన వెంటనే ఎన్నికల షెడ్యూల్ ప్రకటనకు మార్గం సుగమం కానుంది. అందుకే ఈ రిజర్వేషన్ల ఖరారు ప్రక్రియపై రాజకీయ పార్టీలతో పాటు ఎన్నికల నిర్వహణలో భాగమైన అధికారులు కూడా ప్రత్యేక దృష్టి సారించారు.
ఈసారి కూడా మున్సిపల్ ఎన్నికల్లో రిజర్వేషన్లను రొటేషన్ విధానంలో అమలు చేయనున్నారు. గత ఎన్నికల్లో ఏ వార్డులు, ఏ డివిజన్లు, ఏ స్థానాలు రిజర్వ్ అయ్యాయో వాటిని ఈసారి తప్పించి, జనాభా ప్రాతిపదికన మిగిలిన వార్డులకు రిజర్వేషన్లు కేటాయించనున్నారు. ముందుగా ఎస్టీ రిజర్వేషన్లను ఖరారు చేసి, ఆ తర్వాత ఎస్సీ స్థానాలను నిర్ణయిస్తారు. అనంతరం బీసీ వర్గాలకు కేటాయించాల్సిన స్థానాలను ఖరారు చేస్తారు. ఈ ప్రక్రియ పూర్తయిన తర్వాత మహిళలకు కేటాయించాల్సిన రిజర్వుడ్ స్థానాల ఎంపిక జరుగుతుంది. మహిళా రిజర్వేషన్లు రాజకీయంగా అత్యంత కీలకమైనవిగా మారుతుండటంతో, వాటి కేటాయింపుపై ప్రత్యేక శ్రద్ధ వహిస్తున్నారు. హైదరాబాద్తో పాటు జిల్లాల్లో మహిళలకు రిజర్వు చేయాల్సిన వార్డులను రాజకీయ పార్టీల ప్రతినిధుల సమక్షంలో డ్రా పద్ధతిలో ఖరారు చేయనున్నారు. ఈ డ్రా ప్రక్రియ పూర్తయిన వెంటనే రిజర్వేషన్లపై ఉన్న అనిశ్చితి పూర్తిగా తొలగనుంది.
రిజర్వేషన్ల ఖరారుతోనే మున్సిపల్ ఎన్నికల రాజకీయ సమీకరణాలు స్పష్టంగా బయటపడతాయి. ఇప్పటివరకు ఆశావహులు తమ అవకాశాలపై అంచనాలతో ఉన్నప్పటికీ, తుది జాబితా వెలువడిన తర్వాతే ఎవరి రాజకీయ భవిష్యత్ ఏ దిశగా సాగుతుందో స్పష్టత రానుంది. ముఖ్యంగా మేయర్ పీఠాలు, చైర్పర్సన్ పదవులు ఎవరికి రిజర్వ్ అవుతాయన్న అంశం పార్టీల్లో అంతర్గత రాజకీయాలను ప్రభావితం చేసే అవకాశముంది. కొన్ని చోట్ల రిజర్వేషన్లు మారడం వల్ల కొత్త ముఖాలకు అవకాశం లభిస్తే, మరికొన్ని చోట్ల గతంలో పోటీ చేసిన ఆశావహులు ఈసారి తప్పుకునే పరిస్థితి కూడా ఎదురయ్యే అవకాశం ఉంది.
రిజర్వేషన్ల ప్రక్రియ పూర్తయిన తర్వాత ఎన్నికల షెడ్యూల్పై ప్రభుత్వం, ఎన్నికల సంఘం కీలక నిర్ణయాలు తీసుకునే దశకు చేరుకుంటాయి. ఈ నెల 18న మేడారంలో మంత్రిమండలి సమావేశం జరగనున్న నేపథ్యంలో, ఆ సమావేశంలో మున్సిపల్ ఎన్నికల తేదీలపై చర్చ జరిగే అవకాశాలు ఉన్నట్లు రాజకీయ వర్గాల్లో చర్చ జరుగుతోంది. ప్రభుత్వం ఆమోదం తెలిపిన వెంటనే రాష్ట్ర ఎన్నికల సంఘం ఎన్నికల షెడ్యూల్ను ప్రకటించే వీలుందని సమాచారం. ఇప్పటికే మున్సిపల్, పోలీస్ శాఖల నుంచి ఒకే విడతలో ఎన్నికలు నిర్వహించడంపై ఎన్నికల సంఘం అభిప్రాయాలు సేకరించిన నేపథ్యంలో, ఈసారి మున్సిపల్ ఎన్నికలు ఒకే విడతలో జరిగే అవకాశాలు ఎక్కువగా కనిపిస్తున్నాయి. గతంలో సర్పంచ్ ఎన్నికలను మూడు విడతల్లో నిర్వహించిన అనుభవాలను పరిగణనలోకి తీసుకొని, భద్రత, సిబ్బంది వినియోగం, ఖర్చులు తగ్గించాలనే ఉద్దేశంతో ఒకే విడతలో ఎన్నికలు నిర్వహించాలనే ఆలోచన బలపడినట్లు తెలుస్తోంది.
మొత్తంగా చూస్తే, నగరపాలక సంస్థలు, పురపాలక సంఘాల్లో రిజర్వేషన్ల ఖరారు ప్రక్రియతో రాష్ట్రంలో మున్సిపల్ ఎన్నికల వేడి అధికారికంగా మొదలైనట్టే కనిపిస్తోంది. రిజర్వేషన్లపై స్పష్టత వచ్చిన వెంటనే రాజకీయ పార్టీలు తమ అభ్యర్థుల ఎంపిక, ప్రచార వ్యూహాలపై దృష్టి పెట్టనున్నాయి. ఆశావహుల్లో ఉత్కంఠ, పార్టీల్లో అంతర్గత చర్చలు, వ్యూహాత్మక కదలికలతో మున్సిపల్ ఎన్నికల వాతావరణం రాష్ట్రవ్యాప్తంగా వేడెక్కే సూచనలు స్పష్టంగా కనిపిస్తున్నాయి.
