శంకర్పల్లి మండలంలో నామినేషన్ల జోరు
శంకర్పల్లి మండలంలో నామినేషన్ల జోరు
జ్ఞాన తెలంగాణ,శంకర్పల్లి:
శంకర్పల్లి మండలంలో పంచాయతీ ఎన్నికల హడావిడి రోజు రోజుకూ తీవ్రమవుతోంది. అధికార పార్టీ నుంచి ప్రతిపక్షాల దాకా అన్ని శక్తులు తమ అభ్యర్థులను గెలుపు గుర్రాలుగా నిలబెట్టేందుకు జోరుగా కసరత్తులు చేస్తున్నాయి. గ్రామాల్లో ఒక వైపు అభ్యర్థుల నామినేషన్ ర్యాలీలు సందడి చేస్తుండగా, మరోవైపు ప్రతి ఇంటిలో రాజకీయ చర్చలు హోరెత్తుతున్నాయి. ముఖ్యంగా జనరల్ స్థానాల్లో పోటీ అసాధారణస్థాయికి చేరి, ప్రతి గ్రామంలో కనీసం ముగ్గురి–నాలుగురి మధ్య సమరం చెలరేగుతోంది.
ఇక ఎన్నికల ప్రభావంతో మండలంలోని పలుచోట్ల మద్యం ఏరులై పారుతోంది. అభ్యర్థుల అనుచరులు ఓటర్లను ఆకర్షించేందుకు భారీగా మద్యం సరఫరా చేస్తున్నారనే ఆరోపణలు వినిపిస్తున్నాయి. మద్యం మత్తులో మునిగిపోయిన ఓటర్లు, ఎన్నికల నైతిక విలువలు గాలిలో కలుస్తున్నట్టు పరిస్థితి కనిపిస్తోంది. యువతపై, రోజువారీ కూలీలపై దీనికి తీవ్రమైన ప్రభావం పడుతోందని గ్రామ పెద్దలు ఆందోళన వ్యక్తం చేస్తున్నారు.
మొత్తంమీద శంకర్పల్లి మండలంలో నామినేషన్ల వేడి, రాజకీయ ప్రత్యర్థుల మతి పోగొట్టేలా తయారైంది. అభ్యర్థుల బలం–అబలాలు, కుల సమీకరణాలు, నాయకుల ప్రభావం, డబ్బు–మద్యం ప్రవాహం కలిసి గ్రామ రాజకీయాలను మరింత ఉత్కంఠభరితంగా మారుస్తున్నాయి. ఇప్పుడు ప్రజలు ఏ అభ్యర్థిని విజేతగా నిలబెడతారో అనే దానిపై చర్చలు నానాటికీ మార్మోగుతున్నాయి.
