ఉపాధ్యాయుల అంకితభావం,ప్రవళిక వెంకట్ రెడ్డి ఆర్థిక ప్రోత్సాహం…!
జ్ఞాన తెలంగాణ, శంకర్ పల్లి: శంకర్‌పల్లి మండలం, రంగారెడ్డి జిల్లా పొద్దుటూరు గ్రామంలోని జిల్లా పరిషత్ ఉన్నత పాఠశాల 2024–25 విద్యా సంవత్సరంలో అసాధారణమైన విజయం సాధించింది. పదవ తరగతి పరీక్షలు రాసిన 10 మంది విద్యార్థుల్లో 9 మంది ఉత్తీర్ణత సాధించడం ద్వారా 90 శాతం విజయశాతాన్ని నమోదు చేసుకుని మండలంలో అగ్రస్థానంలో నిలిచింది. ఇది మండలంలోని ఏ ఇతర ప్రభుత్వ పాఠశాల సాధించలేని ఘనతగా నిలిచింది.
ఈ విజయానికి ముఖ్య కారణం – ఉపాధ్యాయుల తపన, విద్యార్థుల కృషి, తల్లిదండ్రుల మద్దతు. తక్కువ వనరులతో కూడిన గ్రామీణ పాఠశాలలోనూ విద్యా చైతన్యం వెలిగించగలిగిన ఉపాధ్యాయుల పాత్ర ప్రశంసనీయమైనది. ఒక్కో విద్యార్థిని వ్యక్తిగతంగా శ్రద్ధతో పాఠాలు నేర్పుతూ, ప్రతి ఒక్కరినీ ఉత్తీర్ణత దిశగా నడిపించిన ఉపాధ్యాయ బృందానికి గ్రామ ప్రజలు హృదయపూర్వక అభినందనలు తెలియజేస్తున్నారు.
ఈ విజయానికి వెన్నెముకగా నిలిచిన శంకర్‌పల్లి మాజీ వైస్ ఎంపీపీ బొల్లారం ప్రవళిక వెంకట్ రెడ్డి, ప్రతి సంవత్సరం పదవ తరగతి ఉత్తీర్ణత సాధించిన ప్రతి విద్యార్థికి రూ.10,000 చొప్పున నగదు బహుమతి అందిస్తూ విద్యార్థులను అభ్యాసంలో ముందుకు నడిపిస్తున్నారు. ఈ సంవత్సరం కూడా 9 మంది ఉత్తీర్ణులందరికీ రూ.10,000 చొప్పున నగదు బహుమతులు అందించనున్నట్లు తెలియజేశారు. గ్రామ ప్రజల అభిప్రాయం ప్రకారం, విద్యార్థులలో అంకితభావాన్ని పెంపొందించడంలో ఆయన ప్రోత్సాహం ప్రధాన పాత్ర పోషించింది.
అలాగే, అమ్మ ఆదర్శ పాఠశాల చైర్మన్ ఏనుగు లక్ష్మి పాఠశాల అభివృద్ధి కోసం మౌలిక వసతుల కల్పనలో తోడ్పాటు అందిస్తూ, ఉపాధ్యాయులు మరియు విద్యార్థులకు ఎల్లప్పుడూ ప్రోత్సాహకంగా నిలుస్తున్నారు. ఆమె సేవలకు కూడా తల్లిదండ్రులు, ఉపాధ్యాయులు కృతజ్ఞతలు తెలియజేస్తున్నారు.
ఈ విజయం గ్రామస్థాయిలోనే కాకుండా, రాష్ట్రస్థాయిలో వెలుగులు విరజిమ్మే విద్యార్థులను అందించే విద్యాసంస్థగా పొద్దుటూరు పాఠశాలకి గుర్తింపు తెచ్చింది. ఇది ఉపాధ్యాయులు, తల్లిదండ్రులు, నాయకులు మరియు గ్రామ సమాజానికే గర్వకారణం.
శంకర్ పల్లి మాజీ వైస్ ఎంపీపీ బొల్లారం ప్రవళిక వెంకట్ రెడ్డి
